आज ६९औँ विश्व कुष्ठरोग दिवस ।
हरेक वर्ष जनवरी महिनाको अन्तिम आइतबारका दिन विश्व कुष्ठरोग दिवस मनाइन्छ । यसपटक ‘शून्य कुष्ठरोगका लागि हाम्रो प्रतिबद्धता, आत्मसम्मानको लागि ऐक्यबद्धता’ भन्ने नाराका साथ मनाइँदै छ ।
कुष्ठरोग एक सरुवा रोग हो । कुष्ठरोग श्वासप्रश्वासको माध्यमबाट एक व्यक्तिबाट अर्को व्यक्तिमा सर्ने स्वास्थ्य तथा जनसङ्ख्या मन्त्रालयले जनाएको छ ।
मन्त्रालयका अनुसार रोग प्रतिरोधात्मक क्षमता कमजोर भएको व्यक्तिमा कुष्ठरोगको जीवाणु प्रवेश गरेको दुई देखि पाँच वर्ष वा सो भन्दा बढी अवधिमा रोग देखा पर्छ ।
समयमा र नियमित उपचार पाएमा कुष्ठरोग पूर्ण रूपमा निको हुन्छ । तर, समयमै उपचार नगरेमा यसबाट अपाङ्गता हुन सक्ने सम्भावना पनि रहने मन्त्रालयले जनाएको छ ।
अवस्था हेरेर कुष्ठरोगका बिरामीले ६ महिनादेखि १२ महिनासम्म नियमित औषधी सेवन गर्नुपर्ने हुन्छ ।
यस्ता छन् कुष्ठरोग हुदा देखिने लक्षणहरूः
१. शरीरमा छुँदा थाहा नपाउने रातो वा फुस्रो रङको दाग देखिने
२. अनुहार वा शरीरको अन्य भागमा दुख्ने वा नदुख्ने गिर्खाहरू देखापर्ने
३. अनुहारको छाला र कानको लोती बाक्लो र चम्किलो हुने
४. नसा सुन्निने, दुख्नु तथा झमझम गर्ने
५. आँखा चिम्लिँदा पूरै बन्द नहुने
६. आँखीभौँ झर्नु वा पातलो हुने
७. हत्केलाको मांसपेशी सुकेर जाने
८. हातगोडाका औँलाहरू बाङ्गो हुने र कमजोर हुँदै जाने
९. हातगोडा पोल्नु, निदाएको जस्तो हुने र झमझम गरिरहने ।
मन्त्रालयका अनुसार सबै सरकारी स्वास्थ्य संस्थामा कुष्ठरोगको उपचार र औषधि निःशुल्क रुपमा पाइन्छ ।
