महको अनुहार (कविता)

महको अनुहार

जब जब म यी बूढा भएका अनुहारहरू हेर्छु
मलाई किन डर लाग्छ
यी अनुहारहरू बूढो भए भनेर ?
सायद
यी अनुहारहरूलाई
मैले आफ्ना बा-आमासँगै चिनेको हुँ ।
हरेक सन्तानलाई
आफ्ना बा-आमा बूढो भएको देख्दा डर लाग्छ
हरेक दर्शकलाई
आफ्ना प्रिय कलाकार बूढो भएको देख्दा डर लाग्छ ।
डरको पछाडि भयानक मृत्यु छ
र, मृत्युको अगाडि हामी सबै पनि त छौँ ।
यही अनुहारहरूले त हो
मेरो बाल्यकालमा हाँसो रोपेको ।
यही अनुहारहरूले त हो
देश सिकाएको, संस्कृति सिकाएको ।
यी अनुहारहरूले के सिकाएनन् र ?
-राजनीति सिकाए
-द्वन्द्वकाल सिकाए
-स्वास्थ्य सिकाए
-शिक्षा सिकाए
-जात सिकाए
-धर्म सिकाए
-मानवता सिकाए
सबैभन्दा ठुलो कुरा त
– हाँसोको पछाडि एउटा सुन्दर जीवन छ भन्ने सिकाए
यति धेरै सिकाउनेको अनुहार बूढो हुँदै छ ।
कहिलेकाहीँ लाग्छ
मिल्ने भए
चित्रगुप्तको किताबबाट यी दुई अनुहारहरूको पाना च्यातेर ल्याउँ
र हातमा राखेर भनिदउँ
– “हामी सँगै बूढो हुनुपर्छ ल ? “

–निरज दाहाल