२०औं संस्करणको आहा रारा गोल्डकपको उपाधिका लागि आज चिरप्रतिद्वन्द्वी मनाङ मस्र्याङ्दी र नेपाल एपिएफ क्लब आमनेसामने हुँदैछन् ।
पोखरा रङ्गशालामा दिउँसो २ बजे सुरू हुने फाइनल खेलमा मनाङ र एपिएफ दुवै कीर्तिमान बनाउने दाउमा रहनेछन् ।
नेपाल पुलिस क्लबसँगै सर्वाधिक ६ पटकक आहा राराको उपाधि आफ्नो पोल्टामा पारिसकेको मनाङ यस संस्करण पनि जित्दै कीर्तिमानी सातौं पटक उपाधिमा आफ्नो नाम लेखाउन चाहन्छ ।
यता एपिएफ भने पहिलो पटक आहा रारा गौल्डकपको उपाधि जित्न चाहन्छ ।
२०६४ सालको फाइनलमा नेपाल पुलिस क्लबसँग २–० ले पराजित भएयता एपिएफ १४ वर्षपछि पहिलो पटक आहा राराको फाइनल पुगेको हो ।
यता आज एपिएफको प्रतिद्वन्द्वी मनाङको यो १२औं फाइनल हो । १२मध्ये ६ फाइनलमा उपाधि मनाङले जितेको तथ्याङ्कले मनाङ आहा रारामा सफल रहेको पुष्टि हुन्छ ।
क्वाटर फाइनलमा बलियो मानिएको नेपाल पुलिस क्लबलाई २–० ले पाखा लगाउँदै सेमिफाइनल पुगेको मनाङले त्रिभुवन आर्मी फुटबल क्लबलाई पेनाल्टी सुटआउटमा ४–३ ले हराउँदै फाइनलमा स्थान पक्का गरेको थियो ।
यता एपिएफले भने यस संस्करणको आहा रारामा तीन खेल खेल्दै फाइनलमा स्थान बनाउन सफल भएको हो ।
प्रिक्वटार फाइनलमा आयोजक सहारा क्लबलाई २–० गोलान्तरले हराएको एपिएफले फाइनलमा स्थान बनाउन क्वाटरफाइनलमा भुट्निज युथ स्पोर्ट्स क्लब र सेमिफाइनलमा मछिन्द्रलाई समान ३–१ ले स्तब्ध बनाएको थियो ।
उपाधि जित्नेमा दुवै टोली विश्वस्त
आफूहरू १४ वर्षपछि प्रतियोगिताको फाइनलमा पुगेकाले उपाधि जितेरै घर फर्कने एपिएफका कप्तान नविन लामा र प्रशिक्षक कुमार थापाले बताएका छन् ।
फाइनल प्रतिस्पर्धात्मक हुने बताउँदै प्रशिक्षक थापाले टोली उपाधिका लागि भिड्न तयार रहेको बताए ।
प्रशिक्षक थापाको तर्कमा सहमती जनाउँदै कप्तान लामाले पनि टोली उपाधि जित्न सक्षम रहेको बताएका छन् ।
तर एपिएफलाई उपाधि जित्न सहज भने हुने छैन ।
सुधारिएको खेल प्रदर्शन गर्दै एपिएफ फाइनल आइपुगे पनि उसलाई रोक्न मनाङ तयार रहेको प्रशिक्षक फुजा तोपेले बताएका छन् ।
मनाङका कप्तान विमल रानाले पनि उपाधि दौड केही कठिन देखिए पनि टोलीमा तालमेल मिलिसकेकाले उपाधि मनाङले नै जित्ने विश्वास व्यक्त गरे ।
आठ ए डिभिजन क्लब, एक आयोजक र एक विदेशी क्लब गरी दश टोली सम्मिलित प्रतियोगिता जित्ने टोलीले ट्रफीसहित १० लाख एक हजार र उपविजेता टोलीले पाँच लाख एक हजार नगद पुरस्कार प्राप्त गर्नेछ ।
