दश खेलाडीमा सीमित मछिन्द्र फुटबल क्लबलाई ३–१ ले हराउँदै नेपाल एपिएफ आहा रारा गोल्डकपको फाइनलमा प्रवेश गरेको छ ।
पोखरा रङ्गशालामा भएको आजको पहिलो सेमिफाइनलमा एपिएफलाई जिताउन सनिस श्रेष्ठ, प्रदीप लामा र नवीन लामाले समान एक–एक गोल गरे ।
मछिन्द्रका लागि एक गोल ओमुलाजा नुरेम करिमले गरे पनि त्यो टोलीको जितका लागि अपर्याप्त रह्यो ।
पहिलो हाफ एक–एक गोलको बराबरीमा सकिए पनि दोस्रो हाफमा थप एक गोल गर्दै एपिएफ खेल आफ्नो पक्षमा पार्न सफल भयाे ।
खेलको २५औं मिनेटमा गोल गर्दै एपिएफले सुरुवाती अग्रता लिएको थियो ।
छिरिङ गुरुङले आफ्नो पेनाल्टी क्षेत्र नजिकै मणि लामालाई फाउल गरेपछि एपिएफले फ्रिकिकको मौका पाएको थियो ।
सोही फ्रिकिकमा एपिएफका लागि २५औं मिनेटमा सनिस श्रेष्ठले गोल गर्दै एपिएफलाई अग्रता दिलाएका थिए । मणि लामाको क्रसमा श्रेष्ठको हेडरले पोस्टको जाली चुमेको थियो ।
एपिएफले अग्रता लिएपछि पछि परेको मछिन्द्रले गोलका लागि बारम्बार प्रयास गरेको थियो ।
खेलको पहिलो हाफको ४०औं मिनेटमा मछिन्द्र बराबरी गोल गर्न सफल भएको थियो ।
मछिन्द्रका लागि ओमुलाजा नुरेम करिमले हेडमार्फत बराबरी गोल फर्काएका थिए ।
सबिन थापाले मछिन्द्रका मेसुकेलाई फाउल गरेपछि मछिन्द्रले फ्रिकिक पाएको थियो । कप्तान रञ्जित धिमालले प्रहार गरेको फ्रिकिकमा करिमले उत्कृष्ट हेड गर्दै गोल गरेपछि पहिलो हाफ १–१ गोलको बराबरीमा सकिएको थियो ।
दोस्रो हाफमा दुवै टोलीले खेलमा अग्रता लिन प्रयास गरिरहे पनि सफल हुन सकेनन् ।
६८औं मिनेटमा प्रदीप लामाले गोल गर्दै एपिएफलाई २–१ को अग्रता दिलाए । कप्तान नवीन लामाले राइट फ्ल्याङ्कबाट निकालिदिएको क्रसमा एपिएफ दोस्रो पटक अग्रता लिन सफल भएको थियो ।
मछिन्द्र र एपिएफका दुई खेलाडी जुधेर लडेपनि म्याच रेफ्रिले बल नरोकि खेल्न निर्देशन दिएपछि कप्तान लामा गोलका लागि असिस्ट गर्न सफल भए ।
खेलको ७०औं मिनेटमा ओमुलाजा नुरेम करिम दोस्रो पहेलो कार्ड पाउँदै मैदानबाट बाहिरिएपछि मछिन्द्रले खेलमा नियन्त्रण गुमाएको थियो ।
त्यसपछि दश खेलाडीमा सीमित बनेकाे मछिन्द्रले एपिएफकाे अट्याकलाई रोक्दै केही मुभ बनाए पनि सफल हुन सकेन ।
खेलमा थपिएकाे अतिरिक्त समयकाे साताैं मिनेटमा गाेल गर्दै नविन लामाले एपिएफकाे जित सुनिश्चित गरे ।
मछिन्द्रका खेलाडीले बल नियन्त्रणमा लिन नसकेपछि पाएकाे बलमा एपिएफका खेलाडीले पाेस्टमा प्रहार गरेका थिए ।
उक्त प्रहारलाई मछिन्द्रका गोलरक्षक सूर्य पराजुलीले रोके पछि आएको रिबन्डमा कप्तान लामाले खाली पोस्टमा सहज तरिकाले गोल गरेका थिए ।
आजको खेलमा विजयी भएसँगै एपिएफले २०औं आहा रारा गोल्डकपको उपाधिका लागि मनाङ मस्र्याङ्दी क्लब र त्रिभुवन आर्मी फुटबल क्लबबीचको विजेतासँग फाइनलमा खेल्नु पर्नेछ ।
उपाधि जित्ने क्लबले १० लाख एक हजार र उपविजेता टोलीले पाँच लाख एक हजार नगद पुरस्कारसहित ट्रफि प्राप्त गर्नेछन् ।
