२०औं संस्करणको आहा रारा गोल्डकपको पहिलो सेमिफाइनलमा आज मछिन्द्र फुटबल क्लब र नेपाल एपिएफ क्लब आमनेसामने हुँदैछन् ।
पोखरा रङ्गशालामा दिउँसो २ः३० बजे सुरू हुने खेलमा मछिन्द्र एपिएफलाई पाखा लगाउँदै गोल्डकपको फाइनलमा पहिलो पटक स्थान बनाउन चाहन्छ ।
यता एपिएफसँग भने आहा राराको फाइनल खेलेको अनुभव छ । जारी प्रतियोगितामा दुई खेल जित्दै सानदार तरिकाले सेमिफाइनलमा आइपुगेको एपिएफ आफ्नो सोही लयलाई निरन्तरता दिन चाहन्छ ।
प्रतियोगिताको पहिलो खेलमा आयोजक सहारा क्लबलाई २–० गोलान्तरले हराउँदै क्वाटरफाइनल पुगेको एपिएफले भुटनिज युथ स्पोर्ट्स क्लबलाई १–३ ले पाखा लगाउँदै सेमिफाइनलमा स्थान पक्का गरेको थियो ।
एपिएफको आजको प्रतिद्वन्द्वी मछिन्द्रले भने सिधै क्वाटरफाइनल खेलेको थियो । सङ्गटा क्लबविरुद्ध क्वाटरफाइनलमा मैदान उत्रिएको मछिन्द्रदले ४–१ को विशाल अन्तरले खेल आफ्नो कब्जामा पारेको थियो ।
दुवै उत्कृष्ट प्रदर्शन गरिरहेका टोलीबीचको आजको भिडन्त निकै रोचक हुने अनुमान गरिएको छ ।
जारी ‘ए’ डिभिजन लिगका नवौं चरणका खेल सकिँदा समेत आमनेसामने नभएका यी दुवै टोलीमध्ये आजको खेलमा कसले बाजी मार्ला ? यो चासोको विषयमा बनेको छ ।
लिगमा अपराजित मछिन्द्र ९ खेलबाट २३ अङ्कका साथ पहिलो स्थानमा रहँदा समान खेलबाट दश अङ्क जोडेको एपिएफ नवौं स्थानमा छ ।
आजको सेमिफाइनलको विजेताले फाइनलमा मनाङ मस्र्याङ्दी क्लब र त्रिभुवन आर्मी फुटबल क्लबीचको विजेतासँग खेल्नेछ ।
