मछिन्द्र फुटबल क्लब २०औं आहा रारा गोल्ड कपको सेमिफाइनलमा पुगेको छ ।
पोखरा रङ्गशालामा भएको आजको क्वाटर फाइनल खेलमा मछिन्द्रले सङ्कटाविरुद्ध ४–१ को शानदार जित दर्ता गर्न सफल भएको हो ।
मछिन्द्र फुटबल क्लबका लागि पहिलो गोल उत्सव राईले खेलको १२औं मिनेटमा गरे । पेनाल्टी क्षेत्र बाहिरबाट राईले गरेको प्रहारले जाली चुम्दा सङ्कटाका गोलरक्षक राजबाबु थापा मुकदर्शक बने ।
दोस्रो गोल खेलको दोस्रो हाफको ४७औं मिनेटमा भएको थियो ।
सङ्कटाका गणेश हमालको प्रहार रोक्दै म्याथानियल जुडेले राइट फ्ल्याङ्कमा अभिषेक रिजालका लागि सुन्दर पास निकालिदिएका थिए ।
सोही बललाई रिजालले सङ्कटाका पेनाल्टी क्षेत्रभित्र रेजिन सुब्बाका लागि क्रस मिलाइदिएका थिए । तर सुब्बाले बल नियन्त्रणमा लिन नसकेपछि मेसुके इतिग्ने ओलोमोउले गोल गरे ।
मछिन्द्रको दुई गोलको अग्रता कम गर्ने क्रममा सङ्कटाका लागि गणेश हमालले गोल गरे ।
खेलको ६३औं मिनेटमा पाएको कर्नरमा सङ्कटा गोल गर्न सफल भएको थियो । अमित तामाङ्गको कर्नरमा निरज बस्नेतले हेड गर्दै मिलाइदिएको बलमा हमालले गोल गर्दै अग्रता कम गर्ने प्रयास गरेका थिए ।
८४औं मिनेटमा मछिन्द्रका लागि अभिषेक गुरुङ्गले गोल गर्दै टाेलीका ३–१ काे अग्रता दिलाए । कप्तान रञ्जित धिमाललाई अमित तामाङ्गले पेनाल्टी बक्स नजिकै फाउल गरेपछि मछिन्द्रले फ्रिकिक पाएको थियो ।
मछिन्द्रका लागि ओमोलाजा नुरौन करिमले गरेको प्रहार सङ्कताका गोलरक्षक थापाले पूर्ण रुपमा बचाउन नसकेपछि आएको रिबन्डमा तामाङ्गले गोल गर्दै मछिन्द्रलाई ३–१ को अग्रता दिलाएका थिए ।
तेस्रो गोलको अग्रता लिएको दोस्रो मिनेटमा नै मछिन्द्रले चौथो गोल गरेको थियो ।
८६औं मिनेटमा ग्रारसियाले फिल्क गरिदिएको बलमा मेसुकेले सुन्दर गोल गर्दै खेल पूर्ण रुपमा मछिन्द्रको पक्षमा पारेका थिए ।
सङ्कटाविरुद्ध ४–१ गोलान्तरको जित निकाल्दै सेमिफाइनल पुगेको मछिन्द्रले फाइनल पुग्न नेपाल एपिएफल क्लबविरुद्ध माघ १२ मा खेल्नेछ ।
