सुनसरीमा तरबार प्रहार गरी पत्नीको हत्या गरेको आरोपमा पति पक्राउ परेका छन् ।
पक्राउ पर्नेमा भोक्राहा नरसिंह गाउँपालिका-१ उराव टोलका ३२ वर्षीय लालुप्रसाद उराव रहेका छन् । ३० वर्षीया चन्द्रकला उराउलाई तरबार प्रहार गरी हत्या गरेको अभियोगमा लालुप्रसादलाई प्रहरीले शुक्रबार राति पक्राउ गरेको हो ।
सुनसरी प्रहरी प्रमुख सञ्जयसिंह थापाले शब्द एक्सप्रेसलाई दिएको जानकारीअनुसार लालुले आफ्नै पत्नीलाई तरबार प्रहार गर्दा घटनास्थलमै मृत्यु भएको थियो ।
स्थानीयबाट खबर प्राप्त हुनासाथ प्रहरी चौकी भोक्राहा, इलाका प्रहरी कार्यालय लौकही र जिल्ला प्रहरी कार्यालय सुनसरीबाट खटिएको प्रहरीले उनलाई पक्राउ गरेको एसपी थापाले जनाए ।
‘शुक्रबार राति १२ बजे घरायसी झगडाका क्रममा लालुप्रसादले पत्नी चन्द्रकलालाई घरेलु हतियार तरबारले गर्द्धनमा प्रहार गरेका रहेछन्,’ एसपी थापाले शब्द एक्सप्रेससँग भने, ‘उनीहरूका तीन बच्चाहरूबाट स्थानीयले जानकारी पाएपछि प्रहरीलाई खबर गरेछन् । राति नै उनी पक्राउ परेका छन् ।’ यस विषयमा अनुसन्धान भइरहेकाे एसपी थापाले जनाए ।
