मिसावट गरी गुणस्तरहीन मह उत्पादन गरी बिक्री गरेको अभियोगमा काठमाडौँबाट एक जना प्रकाउ परेका छन् ।
पक्राउ पर्नेमा काठमाडाैँ महानगरपालिका-२७ ज्याठाका ८ वर्षीय नरेश श्रेष्ठ भन्ने नरबहादुर श्रेष्ठ रहेका छन् । उनलाई बिहीबार प्रहरीले पक्राउ गरेको हो ।
काठमाडौँ उपत्यकाको विभिन्न स्थानहरूमा गुणस्तरहीन महको उत्पादन एवम् बिक्री भइरहेको भन्ने सूचनाको आधारमा महानगरीय अपराध महाशाखा मीनभवनबाट खटिएको प्रहरीले श्रेष्ठलाई मिसावट गरी गुणस्तरहीन मह बनाइरहेको अवस्थामा पक्राउ गरेको हो ।
प्रहरीले गुणस्तरतहीन तयारी मह ६ सय किलो, मह बनाउन प्रयोग गरिने कच्चा तथा गुणस्तरहीन मह ६ हजार पाँच सय किलो, ग्लुकोज पाँच सय किलो, चिनी एक सय किलो, बरामद गरेको छ ।
श्रेष्ठले बिगत सात वर्ष अगाडिदेखि आफ्नै पत्नीको नाममा नतिजा प्याकेजिङ सञ्चालन गरी गुणस्तरहीन मह बनाई बिक्री गर्ने, नतिजा प्याकेजिङको नाममा कम्पनी दर्ता गरी स्पर्स हनी नामको लेबल टाँसी बिक्री वितरण गर्ने गरेका थिए ।
यस्तै, उनले गुणस्तरहीन मह काठमाडौँ, भक्तपुर र पोखराका होटेल, रेस्टुरेन्टहरूमा थोक तथा खुद्रा बिक्री-वितरण गर्ने गरेको प्रहरीले जनाएको छ ।
