प्रधानमन्त्री शेरबहादुर देउवाले बालबालिकाका लागि चाहिने कोरोना भाइरस (कोभिड–१९) विरुद्धको खोपको प्रबन्ध मिलाउन निर्देशन दिएका छन् ।
सोमबार विपद् जोखिम न्यूनीकरण तथा व्यवस्थापन राष्ट्रिय परिषदले काठमाडाैँमा आयोजना गरेको नवौँ बैठकमा बोल्नेक्रमा प्रधानमन्त्री देउवाले बालबालिकालाई पनि कोभिड–१९ विरुद्धको खोप लागाउनुपर्ने देखिएको भन्दै त्यसका लगि आवश्यक प्रबन्ध गर्न निर्देशन दिए ।
यस्तै, उनले सङ्क्रमणबाट जोगिन कोभिड–१९ विरुद्धको खोप र स्वास्थ्यका मापदण्ड पालनाका साथै सचेतना पनि आवश्यक रहेको बताए ।
कोभिड–१९ को नयाँ भेरियन्टले हाल जनस्वास्थ्यमा समस्या उत्पन्न गरेको उल्लेख गर्दै यसबाट बच्न कोभिड–१९ विरुद्धको खोप लगाउन, स्वास्थ्य सुरक्षाका मापदण्ड पालना गर्न, भौतिक दूरी कायम गर्न, समय समयमा हात धुनेलगायतका सचेतनाको आवश्यकता औँल्याए ।
उनले कोभिड–१९को सङ्क्रमण रोकथामबारे जनतामा सचेतना जगाउन मिडियाको महत्वपूर्ण भूमिका रहेको बताउँदै यसमा सहयोग गर्न आग्रह गरे ।
