सरकारले आइतबार (आज)देखि कोभिड-१९ विरुद्धको बुस्टर डोज दिने भएको छ । स्वास्थ्य तथा जनसङ्ख्या मन्त्रालयले आइतबारदेखि अग्रपङ्क्तिमा काम गर्ने व्यक्तिले बुस्टर डोज खोप लगाउन पाउने जनाएको छ।
यसअघि पहिलो र दोस्रो मात्रा लगाएको खोप केन्द्रबाटै बुस्टर डोज खोप लगाउन पाइने मन्त्रालयकी प्रवक्ता डा. सङ्गीता मिश्राले जानकारी दिइन् ।
चिकित्सक, नर्स, स्वास्थ्यकर्मी, एम्बुलेन्सका ड्राइभरकासाथै पत्रकार, कर्मचारी, कानुनव्यवसायी, विभिन्न कूटनीतिक नियोगका कर्मचारी, वित्तिय संस्थामा काम गर्ने कर्मचारी र ज्येष्ठ नागरिकलाई बुस्टर डोज दिइने स्वास्थ्य मन्त्रालयले जनाएको छ ।
यसअघि स्वास्थ्य तथा जनसङ्ख्या मन्त्रालयले कुल जनसंख्याको ४० प्रतिशत मानिसलाई कोरोना विरुद्धको खोप लगाएपछी मात्र बुष्टर डोज शुरु गर्ने जनाएको थियो ।
हालसम्म कुल जनसंख्याको ३९.१ प्रतिशत मानिसले पूर्ण खोप लगाइसकेका छन् । ‘बुस्टर’ डोजमा पहिले जुन खोप लगाएको हो सोही खोप लगाउनुपर्ने पनि मन्त्रालयले जनाएको छ
