बन्न नसकेका समाचार
सिटामोल अभावका हुम्लाका घटनाहरू
समाचार बन्न सक्दैनन् !
अनि बन्न सक्दैन समाचार,
चिसो सिरेटोले सेकिएका
मान्छेका व्यथाहरूको !
अनि समाचार बनाउन पनि त मिलेन
भरेभोलिको हुरिले उडाउने
जस्तापाताको छानामुनि सञ्चालित
आइसियू कक्षहरूको !
समाचार बन्न त,
ब्रान्डेड मदिरा, नाम चलेका सिमेन्ट र स्टिल उद्याेगहरूको
खपत बढ्नुपर्छ !
समाचार बन्न
हिउँ पर्नुपर्छ चन्द्रागिरिमा ,
चिसो बढ्नुपर्छ नगरकोटमा
अनि पानी पर्नुपर्छ काठमाडौँमा !
जब शीतलहरले
तराईमा मान्छे मर्छ्न् ,
त्यो नदेख्न
ठुला-ठुला भ्युटावरहरू बनाएछि
बल्ल बन्छन् समाचार !
यो समाचार ,
यो सरकार ,
यो शासन,
आकाश छुने महल हुनेहरूको हो !
भुइँमान्छेलाई त
भुइँमै घिस्रिन पनि कानुन लाग्छ ।
तर ढुक्क हुनुस् !
तपाई
समृद्ध नेपाल
खुसी नेपाली मध्यमा पर्नुहुन्छ ।
-फुलुश्री
