होटल व्यावसायमा लामो समय बिताएका विराटनगरका दुई युवाले आधुनिक कृषि उद्यममा हात हालेका छन् ।
झन्डै आठ करोड रुपैयाँ लगानीमा सञ्जय चापागाईं र गजेन्द्र शर्मा बन्जराले विराटनगर महानगरपालिका–१२ दरैया बस्तीमा बन्जरा एग्रो फार्मको नाममा आधुनिक कृषि उद्यम सञ्चालनमा ल्याएका हुन् ।
चापागाईं र बन्जराले ५० करोड रुपियाँ लगानी गर्ने लक्ष्यसहित बञ्जरा कृषि फार्म स्थापना गरेका हुन् । पहिलो चरणको काम हुँदै गर्दा फार्मले दैनिक आठ लिटर दूध उत्पादन गर्न थालिसकेको छ भने आगामी वैशाखदेखि दैनिक एक हजार ५०० लिटर दूध उत्पादन गर्ने लक्ष्य राखेको छ । फार्ममा २५ देखि ४२ लिटरसम्म दूध दिने होलस्टेन जर्सी गाई छन् ।
आठ महिनाअघि पाँच बिघा जमिनमा सुरु भएको यो फार्मले पहिलो चरणको काम सम्पन्न गर्नासाथ यहाँ उत्पादन हुने दूधलाई आउँदो वैशाखदेखि बोटलिङ गरी बजारमा लैजाने तयारी गरेको सञ्चालक सञ्जय चौलागाईंले जानकारी दिए ।
कृषि फार्मले स्वचालित प्रविधिमा आधारित डेरी उद्योग सञ्चालनको तयारी गरेको छ । गाईलाई घाँस तथा पानी खुवाउने, गोबर सोहोर्ने, दूध दुहुनेजस्ता काम पनि मेसिनबाटै हुने बताइएको छ ।
फार्म पूर्ण रूपमा सञ्चालनमा आएपछि दैनिक पाँच हजार लिटर दूध र ५०० किलोग्राम तरकारी उत्पादन गरी बजारमा पठाउने योजनाअनुसार फार्मले काम गरिरहेको छ । फार्ममा कृषि विषयमा स्नातकोत्तर र स्नातक दुई जनासहित २५ जनाले रोजगारी पाएका छन् ।
युवा जनशक्ति कृषि पेसाबाट विमुख भइरहेका बेला चापागाईं र बन्जराले पेसा परिवर्तन गरी कृषिमा लगानी गर्ने आँट गरेको भन्दै पशु सेवा विभागका उपमहानिर्देशक लेखराज दाहालले सरकार र अन्य सरोकारवालाले प्रोत्साहन गर्नुपर्ने बताए । गाई फार्मको अतिरिक्ति बञ्जरा एग्रोले टनेल खेतीलाई पनि सँगसँगै अगाडि बढाएको छ । टनेलमा विभिन्न जातका बेमौसमी तरकारी लगाइएका छन् ।
दरैयाबस्तीमा ५ बिघा जग्गा खरिद गरेर सुरु गरेको फार्ममा पालिएका गाईलाई फार्म आफैँले उत्पादन गरेको गुणस्तरीय साइलेज खुवाउने गरिएको छ । त्यसका लागि सुनसरीको देवानगञ्जका किसानहरुसँग ५० बिघा खेतमा मकैखेती गर्ने सम्झौता गरेको छ । किसानहरुले वर्षको दुई सिजन मकैखेती गरी साइलेज बनाउन यो फार्मलाई दिने गरेका छन् ।
फार्मले मकै काट्ने र साइलेज बनाउने ‘मोवाइल मेसिन’ किसानको खेतमै पुर्याउने गरेको छ । खेतमा रोपेको मकै ८५ औं दिनमा काटेर साइलेज बनाइरहेको र आगामी दिनमा थप क्षेत्रफलका लागि किसानसँग सम्झौता गर्ने तयारी भइरहेको चापागाईँले जानकारी दिए ।
