इन्टरनेट दैनिक जीवनमा अपरिहार्य बनिसकेको छ ।
प्रविधिको विकाससँगै इन्टरनेटको गतिमा पनि वृद्धि हुँदै जाने क्रम बढ्दो छ । क्लासिक टेकले नेपालमा एक हजार एमबीपीएस गतिको इन्टरनेट प्याकेज सार्वजनिक गरेको छ ।
केही समय अघि घोषणा गरिसकेको सो प्याकेज टायकनको नाममा ब्रान्डिङ गर्दै मङ्गलबार एक कार्यक्रमबीच बजारमा ल्याएको छ ।
वार्षिक मूल्य ४७ हजार ९८८ रुपैयाँ पर्ने यस प्याकेजमा एक हजार एमबीपीएस गतिको इन्टरनेटका साथै तीन ओटा आईपीटिभी समेत राखिएको कम्पनीले जनाएको छ ।
कम्पनीका अनुसार प्याकेजमा इन्स्टलेसन, एफटीटीएच केबल र डुअल ब्यान्ड फाइभजी राउटर निःशुल्क रुपमा उपलब्ध गराइने भएता पनि राउटरका लागि ५०० रुपैयाँ र आईपीटिभी सेटटप बक्सका लागि ५०० रुपैयाँ डिपोजिट राख्नुपर्ने जनाएको छ ।
यस बाहेक कम्पनीले ६२५ एमबीपीएस, ३२५ एमबीपीएस, २२५ एमबीपीएस र १५० एमबीपीएस गतिका अन्य प्याकेजहरू पनि ल्याएको छ ।
