फिलिपे कौटिन्होलाई प्रशिक्षण गराउन आफू उत्साहित रहेको एस्टन भिल्लाको प्रशिक्षक स्टेवन जेरार्डले बताएका छन् ।
बार्सिलोनाबाट बाँकी सिजन लोनमा इंग्लिस क्लब एस्टन भिल्ला आइपुगेका ब्राजिलियन मिडफिल्डर कौटिन्हो एक उत्कृष्ट खेलाडी भएको बताउँदै जेरार्डले उनलाई आफ्नो टोलीमा पाउनुले आफू उत्साहित रहेको खुलाएका हुन् ।
‘टोलीका अन्य खेलाडीले कौटिन्होको अनुभव र क्षमताबाट फाइदा लिन सक्छन्’ प्रशिक्षक जेरार्ड भन्छन्, ‘म आफैं पनि उसको सहकर्मी बनेर खेलिसकेको छु । कौटिन्हो असल खेलाडी हुन् । उनलाई टोलीमा पाउँदा खुशी छु, काम गर्न उत्साहित छु ।’
चोट र अफ्रिका कप अफ नेसन्सका कारण क्लबमा रहेको अट्याकिङ समस्यालाई कौटिन्होको उपस्थितीले केही राहत दिने जेरार्डले विश्वास लिएका छन् ।
भिल्लाका लागि फिट भएको सङ्केत पाइसकेका कौटिन्हो यतिबेला वर्क पर्मिटको कागजी प्रक्रिया मिलाउन फ्रान्समा रहेका छन् । बुधबारसम्ममा कौटिन्होले टोलीका अन्य सदस्यसँगै प्रशिक्षणमा सहभागी हुने सम्भावना रहेको छ ।
