कुनैपनि कम्प्युटरको आधारभूत तत्व हो र्याम (RAM) ।
कम्प्युटरको अपरेटिंग सिस्टमदेखि लिएर प्रयोगकर्ताले प्रयोग गर्ने सबै प्रोग्रामहरू र्याममा लोड हुने गर्छ ।
कम्प्युटर अन गरेपछि हार्ड डिस्कबाट अपरेटिंग सिस्टमका लागि आवश्यक पर्ने फाइलहरू र्याममा सरुवा हुन्छ । र्यामले कम्प्युटर सुचारु भएको बेलामा मात्र काम गर्छ भने कम्प्युटर अफ भएपछि र्याममा भएका सम्पूर्ण फाइलहरू स्वतः डिलिट हुन्छ ।
जति धेरै क्षमताकाे र्याम, त्यती नै धेरै प्रोग्रामहरु एकै पटकमा कम्प्युटरलाई स्लो नबनाइ चल्न सक्छ । फोटोसप, लाइटरूम, एडाेब भिडियो एडिटर जस्ता सफ्टवेयर राम्रोसँग प्रयोग गर्नका लागि धेरै क्षमताकाे र्याम उपयोगी हुन्छ । ल्यापटपको र्याम र डेस्कटपमा प्रयोग हुने र्याम भिन्न प्रकारका हुन्छन् ।
प्रयोगकर्ता अनुसार र्यामको आवश्यकता फरक
प्रयोगकर्ताको आवश्यकता अनुसार कति जीबी र्याम भएको कम्प्युटर खरिद गर्ने भन्ने निर्धारण गर्न सकिन्छ ।
२ जीबी वा सो भन्दा कम
एक पटकमा एउटा मात्र प्रोग्राम चलाउने र क्रोम जस्ता ब्राउजरमा पनि ४–५ वटाभन्दा बढी ट्याब नखोल्ने प्रयोगकर्ता हुनुहुन्छ भने तपाईकाे लागि २ जीबीसम्मको र्याम उपयुक्त हुन्छ ।
४ जीबी
सामान्य घरेलु प्रयोजनका लागि, अफिसका वर्ड, एक्सेल आदि कामका लागि, सामान्य इन्टरनेट ब्राउज गर्नका लागि ४ जीबीसम्मको र्याम उचित हुन्छ ।
८ जीबी
नयाँ गेमहरू खेल्न, फोटो र भिडियो एडिटिंग गर्न, इन्टरनेट ब्राउज गर्दा धेरै वटा ट्याब खोलेर काम गर्न ८ जीबीको र्याम उपयुक्त हुन्छ ।
१२ जीबी देखि १६ जीबी सम्म
उच्च गुणस्तरका गेमहरू खेल्न, रेजोलुसनमा काम गर्न, फोटो/भिडियो एडिटिंग, थ्री डी मोडलिङ आदिका कामका गर्नका लागि १२ देखि १६ जीबीसम्मको र्याम उपयुक्त हुन्छ ।
१६ जीबी वा बढी
यदि तपाई विज्ञान सम्बन्धि रिसर्च गर्न र सिमुलेसनका लागि कम्प्युटर खरिद गर्दै हुनुहुन्छ भने तपाईका लागि १६ जीबीसम्मका र्याम उपयुक्त हुन्छ ।
जान्नु पर्ने अन्य कुराहरू
आजभोलिका नयाँ स्लिम ल्यापटपहरूमा पछि र्याम थप्न वा फेर्न मिल्दैन, त्यसैले खरिदको समयमा नै आवश्यकता अनुसारको र्यामको साइज निर्धारण गर्नु उपयुक्त हुन्छ । थोरैमा पनि ८ जीबी र्याम भएका ल्यापटप किन्नु उपयुक्त हुन्छ ।
