हिमालय शेर्पालाई २–० गोलान्तरले हराउँदै थ्रीस्टार ‘ए’ डिभिजन लिग अङ्कतालिकाको पाँचौँ स्थानमा उक्लिएको छ ।
दशरथ रङ्गशालामा आज भएको एकमात्र खेलमा थ्रीस्टारलाई जिताउन अन्सुमाना क्रोमाहले एक गोल गरे भने एक गोल शेर्पाले उपहार दिएको थियो ।
पहिलो हाफ गोलरहित बराबरीमा सकिएपनि दोस्रो हाफको ५६औँ मिनेटमा थ्रीस्टारले अग्रता लिएको थियो ।
ऋतिककुमार खड्काको स्लो टच शेर्पाको डिफेन्डर अमृत श्रेष्ठसँग ठोक्किदै डिफ्लेक्ट भएपछि गोलरक्षक दीप कार्की निरीह बनेका थिए ।
पहिलो गोल उपहारमा दिएपछि निकै सन्तुलित फुटबल खेलेको शेर्पा खेल अवधिभर गोल गर्न भने असफल रह्यो । यता थ्रीस्टारले भने दोस्रो गोलका लागि निर्धारित समयपछिको अतिरिक्त समयसम्म पर्खिनु प¥यो । दोस्रो हाफमा थपिएको १० मिनेटको इन्ज्यूरी समयको छैटौँ मिनेटमा अन्सुमानाले गोल गर्दै थ्रीस्टारको जित पक्का गरे ।
लाकेन लिम्बूले मध्यभागबाट निकालिदिएको पासमा अन्सुमानाले वान भर्सेज वानमा उत्कृष्ट गोल गरेसँगै थ्रीस्टार शेर्पाविरुद्ध २–० को जित निकाल्न सफल भएको हो ।
जितसँगै अङ्कतालिकामा शेर्पालाई पछि पार्दै थ्रीस्टार पाँचौँ स्थानमा उक्लिएको छ । समान खेल खेलेको शेर्पा ११ अङ्कको साथ तालिकाको छैटौँ स्थानमा झरेको छ ।
लिगको आठौँ चरणको अन्तिम खेलमा भोलि नेपाल पुलिस क्लब र ब्रीगेड ब्वाइज क्लब आमनेसामने हुँदैछन् । खेल दशरथ रङ्गशालामा दिउँसो एक बजे सुरू हुनेछ ।
