राष्ट्रिय परिचयपत्र लिन काठमाडौँमा बढेको भीडलाई सम्बोधन गर्दै राष्ट्रिय परिचयपत्र तथा पञ्जीकरण विभागले व्यवस्था गर्ने भएको छ ।
आज (शुक्रबार) एक विज्ञप्ति जारी गर्दै विभागले आइतबारदेखि काठमाडौँ जिल्लाका सबै इलाका प्रशासन र स्थानीय तहबाट राष्ट्रिय परिचयपत्रको सेवा लिन सकिने गरी व्यवस्था मिलाएकाे हाे ।
विद्युतीय राहदानी लिनका लागि राहदानी विभागले मङ्सिर १ बाट राष्ट्रिय परिचयपत्र अनिवार्य गरेसँगै काठमाडौँ प्रशासन कार्यालय क्षेत्रमा अत्यधिक भीड हुने गरेको छ । साेही भीडकाे सम्बाेधन गर्दै विभागले यस्ताे व्यवस्था गरेकाे जनाएकाे छ ।
राष्ट्रिय परिचयपत्र अनिवार्य गरिएपनि सबै जिल्ला प्रशासन कार्यायलयमा विद्युतीय राहदानीको अनलाइन आवेदन दिन सकिने व्यवस्था भइनसकेकाले काठमाडौँमा आई राहदानीको सेवा लिने नागरिकलाई सो व्यवस्था गर्न लागिएको विज्ञप्तिमा उल्लेख गरिएको छ ।
‘बागमती प्रदेशको ललितपुर र भक्तपुरबाहेक सबै जिल्ला तथा प्रदेश २ का अत्यावश्यक सेवाग्राहीका जिल्ला प्रशासन कार्यालय काठमाडौँमा व्यवस्था मिलाइएको छ’ विज्ञप्तिमा लेखिएको छ, ‘ललितपुर, कर्णाली र सुदूरपश्चिम प्रदेशका अत्यावश्यक सेवाग्राहीका लागि जिल्ला प्रशासन कार्यालय ललितपुर तथा प्रदेश १, लुम्बिनी र गण्डकी प्रदेशका सेवाग्राहीका लागि नारायणहिटी दरबार परिसरमा व्यवस्था गरिएको छ ।’
कोभिड संक्रमणबाट सुरक्षित रहदै राहदानी बनाउन अनुरोध गरेको विभागले अत्यावश्यक नभए भीडभाड नगरी क्रमिक रुपमा नै विवरण उपलब्ध गराउन र सम्भव भएसम्म जिल्लाबाट नै राष्ट्रिय परिचयपत्र लिन अनुरोध गरेको छ ।
