झापामा आगलागी भइ खाना पकाउने ग्यास विस्फाेट हुँदा एक जनाको मृत्यु भएको छ । बुधबार बेलुका झापाको मेचीनगर नगरपालिका–७ पिपल चोकस्थित एक घरमा भएको आगलागी र विस्फोटका कारण अन्य १२ जना घाइते भएका छन् ।
हिजो बेलुका ९ बजेतिर स्थानीय केशव पाठकको घरमा आगलागी भएको थियो । आगो निभाउन जाँदा घरमा रहेको ग्यास सिलिन्डर पड्किएर मेचीनगर–८ की ४५ वर्षीय शरद राजवंशीको मृत्यु भएको जिल्ला प्रहरी कार्यालयका प्रवक्ता प्रहरी नायब उपरीक्षक बसन्त पाठकले जानकारी दिए ।
सिलिन्डर पड्किँदा आगो निभाउन गएका सोही स्थानका ४० वर्षीय लेखनाथ तिमल्सिना, बिर्तामोड–९ का २९ वर्षीय गोविन्दप्रसाद राजवंशी, मेचीनगर–७ का ३२ वर्षीय दीपेन्द्र कार्की, ३८ वर्षीय चन्दन गौतम, ४० वर्षीय सुबलाल राजवंशी, ३५ वर्षीय विनोद गिरी, ३५ वर्षीय नवराज श्रेष्ठ, २३ वर्षीय सन्देश बोहोरा, ४० वर्षीय भवानीशङ्कर न्यौपाने, ३६ वर्षीया निर्मल शर्मा, मेचीनगर–८ का ३४ वर्षीय हरि र आठ वर्षीया सुशीला अधिकारी घाइते भएको प्रहरीले जनाएको छ ।
केशवको टिनको छानो, चित्राको बेरा भएको एक तले कच्ची घरमा रामेछाप घर भएका कुमार पाण्डे भाडामा बस्दै आएको र घरमा कोही नभएको अवस्थामा राति ९ः२० बजे आगो लागेको जनाइएको छ । आगलागी नगरपालिकाको दमकल, प्रहरी र स्थानीयवासीको सहयोगमा राति १०ः२० बजे पूर्ण रूपमा नियन्त्रणमा आएको थियो ।
