‘धरान डे’का अवसरमा सुनसरीस्थित धरान उप–महानगरपालिका आएका प्रधानमन्त्री शेरबहादुर देउवाले अटोमा बसेर धरान अवलोकन गरेका छन् ।
सेनाको हेलिकप्टरमार्फत धरान आएका प्रधानमन्त्री देउवा केहीबेर अटोमा धरान बजार घुमेका थिए ।
नेपाली काङ्ग्रेसको सभापतिमा निर्वाचित भएयता उनको यो पहिलो औपचारिक भ्रमण कार्यक्रम हो ।
विधिवत् रुपमा नगरपालिका घोषणा भएको ६१औं वर्ष पूरा भएको अवसरमा धरान उप–महानगरपालिकाले पुस २० देखि २२ सम्म धरान स्थापना दिवस अर्थात ‘धरान डे’ कार्यक्रम आयोजना गरेको छ । प्रधानमन्त्री देउवा साेही कार्यक्रममा सरिक हुन धरान आएका हुन् ।
आजै काठमाडौं फर्कने कार्यतालिकासहित आएका देउवाले सुनसरी क्षेत्र नं १ को नवनिर्मित पार्टी कार्यालय भवनको उद्घटान गरेका छन् ।
त्यस्तै, धरान–६ पानवारीमा रहेको फोहोर प्रशोधन केन्द्रको उदघाटन कार्यक्रम र धरान–८ मा बन्दै गरेको बसपार्कको अवलोकन गरेका छन् ।
त्यसलगायत अन्य कार्यक्रम र नेता, कार्यकर्ता भेटघाट गरी देउवा आजै काठमाडौं फर्कने तयारीमा रहेका छन् ।
