प्रधानमन्त्री शेरबहादुर देउवालाई भेटेर राष्ट्रिय प्रजातन्त्र पार्टी (राप्रपा) ले पृथ्वी जयन्तीका दिन सार्वजनिक बिदा दिन माग गरेको छ ।
राप्रपाका नयाँ निर्वाचित अध्यक्ष राजेन्द्र लिङ्देन नेतृत्वको टोलीले हिजाे प्रधानमन्त्री देउवालाई भेटेर पुस २७ गते सार्वजनिक बिदा दिन ज्ञापनपत्र बुझाएको हाे ।
सार्वजनिक बिदाबाहेक पृथ्वी जयन्तीलाई राष्ट्रिय एकता दिवसका रूपमा मनाइनु पर्नेमा समेत राप्रपाले जोड दिएको छ ।
यसबाहेक, पृथ्वीनारायाण शाहको तस्बिरलाई नेपाली मुद्रामा राख्नुपर्ने माग राप्रपाको छ ।
पुस २७ लाई पृथ्वी जयन्तीका रूपमा मात्रै नभई राष्ट्रिय पर्वको रूपमा मनाउन थाल्नुपर्ने राप्रपाको भनाइ छ ।
प्रधानमन्त्रीको सरकारी निवास बालुवाटारमा पुगेर ज्ञापनपत्र बुझाएको राप्रपाले आफूहरूको माग सुनुवाइ नभए देशव्यापी विरोध प्रदर्शन गर्ने चेतावनीसमेत दिएको छ ।
अध्यक्ष लिङ्देनले लेखेको पत्रमा ‘२०७४ सालमा सम्माननीय प्रधानमन्त्रीज्यूकै नेतृत्वको सरकारले सार्वजनिक बिदा दिने भनी गरेको निर्णय उपयुक्त रहेको र जनस्तरले स्वागत गरेको भएतापनि त्यसले निरन्तरता पाउन नसकेको अवस्थामा सार्वजनिक बिदा दिने प्रधानमन्त्रीज्यूको पूर्ववर्ति निर्णयलाई पुनः स्मरण गराउँदै आगामी पौष २७ गते सार्वजनिक बिदा दिनुको साथै सरकारी स्तरबाटै पृथ्वी जयन्ती तथा राष्ट्रिय एकता दिवस मनाउने निर्णय गराउन माग गर्दछ,’ उल्लेख छ।
