डोल्पा कारागारबाट सुरुङ खनेर आठ जना कैदीबन्दी फरार भएको घटनाको अनुसन्धान अब प्रहरी प्रधान कार्यालयबाट समेत हुने भएको छ। घटनाको छानबिन गर्न प्रहरी मुख्यालयबाट खटिएको टोली डोल्पा पुगिसकेको छ।
जिल्ला प्रहरी कार्यालय डोल्पाका प्रहरी नायब उपरीक्षक अनिलराज गिरीका अनुसार घटनाबारे जिल्ला तहमा पनि छुट्टै अध्ययन समिति गठन गरी अनुसन्धान भइरहेको छ। जिल्ला प्रहरी कार्यालयका एक प्रहरी निरीक्षकको नेतृत्वमा बनेको समितिले केही दिनदेखि काम गरिरहेको छ।
प्रहरी मुख्यालयबाट आएको अनुसन्धान टोलीको नेतृत्व प्रहरी वरिष्ठ उपरीक्षक राजिवबहादुर बस्नेतले गरेका छन्। पाँच सदस्यीय टोलीमा मुख्यालयका तीन जना र कर्णाली प्रदेश प्रहरी कार्यालयका एक जना प्रहरी अधिकारीसमेत सहभागी छन्।
बस्नेतका अनुसार टोली डोल्पा पुगेर जिल्ला प्रहरी कार्यालयमा सम्पर्क गरिसकेको छ। अब घटनाको अनुसन्धान अघि बढाइनेछ।
गत शुक्रबार राति जबर्जस्ती करणी मुद्दाका पाँच जना र चोरी मुद्दाका तीन जना गरी आठ कैदीबन्दीले करिब चार मिटर लामो सुरुङ खनेर कारागारबाट फरार भएका थिए।
फरार कैदीबन्दीको खोजीकार्य जारी रहे पनि उनीहरू अहिलेसम्म फेला पर्न सकेका छैनन्।
