सोलुखुम्बुको खुम्बु पासाङल्हामु गाउँपालिका–४ स्थित फेरुचे हेलिप्याडमा दुई हेलिकप्टर आपसमा ठोक्किँदा एक भारतीय नागरिकको मृत्यु भएको छ भने तीन जना घाइते भएका छन्।
आज बिहान करिब ८ बजेर ११ मिनेटमा फिस्टेल एयर र डाइनेस्टी एयरका हेलिकप्टर अवतरण गर्ने क्रममा एकआपसमा ठोक्किएर दुर्घटना भएको हो।
दुर्घटनामा भारतको तमिलनाडु राज्यस्थित चेन्नईका करिब ४७ वर्षीय वसन्तकुमार बलरामुडुको घटनास्थलमै मृत्यु भएको छ। उनको शव प्रभु एयरको हेलिकप्टरमार्फत लुक्लाको बिसुगार्ड ल्याइएको जनाइएको छ।
दुर्घटनामा न्युजिल्यान्डका करिब ४९ वर्षीय सेलिशकुमार पटेल, फिस्टेल एयरका पाइलट रविन्द्र प्रजापति र डाइनेस्टी एयरका पाइलट प्रजल केसी घाइते भएका छन्।
घाइतेमध्ये पटेल र पाइलट प्रजापतिलाई थप उपचारका लागि काठमाडौंस्थित मेडिसिटी अस्पताल ल्याइएको छ। डाइनेस्टी एयरका पाइलट केसीको भने लुक्लास्थित निकोल निक्की अस्पतालमा उपचार भइरहेको छ।
उनको स्वास्थ्य अवस्था सामान्य रहेको जनाइएको छ।
