दसैँको चहलपहल बढिरहेका बेला बाँकेका किसान भने पाकेको धान सुरक्षित रूपमा घर भित्र्याउने धपेडीमा छन्। वर्षभरि खाने अन्न बालीमा वर्षाले क्षति पुर्याउने चिन्ताले किसानलाई चाडपर्वभन्दा खेतबारीको काममा बढी व्यस्त बनाएको छ।
नेपालगन्ज उपमहानगरपालिका–१९ सुइयागाउँका किसान ध्रुव थापाका अनुसार असारमा रोपेको धान पाकेर खेतमा पहेँलपुर भएको छ। तर, मौसममा फेरि बदली भएर पानी परे बालीमा ठूलो क्षति हुन सक्ने भएकाले उनीहरू छिटो धान काटेर भित्र्याउन लागिपरेका छन्।
गत साता परेको भारी वर्षाका कारण धान काट्ने काम प्रभावित भएको थियो। केही दिनदेखि पानी रोकिएपछि किसानले खेताला लगाएर धान काट्ने र भण्डारण गर्ने कामलाई तीव्रता दिएका छन्।
यस वर्ष दसैँ ढिलो परेकाले धान पाक्ने समय र चाडपर्व एकैपटक जुधेको राप्ती सोनारी–५ का किसान अशोक वलीले बताए। धान भित्र्याउनुपर्ने समयसँगै बारीमा गहुँ छर्ने बेला पनि सुरु भएकाले किसानलाई कामको चाप थपिएको उनको भनाइ छ।
राप्ती सोनारी गाउँपालिका–३ का वडाध्यक्ष मीनकुमार चौधरीका अनुसार वर्षाका कारण रोकिएको धान काट्ने काम अहिले किसानले आपसी सहयोग र अर्मपर्म गरेर अघि बढाइरहेका छन्। समयमै मनसुन सुरु भएकाले यस वर्ष धान उत्पादन राम्रो देखिए पनि पाकेको बाली भित्र्याउने बेलामा वर्षाको जोखिम कायम रहेको उनले बताए।
कृषि ज्ञान केन्द्र बाँकेकी सूचना अधिकारी तथा वरिष्ठ कृषि प्रसार अधिकृत सुजिता शर्माले पनि धान पाकेर काट्ने समयमा पानी पर्ने जोखिमका कारण किसानले धमाधम बाली भित्र्याइरहेको जानकारी दिइन्।
कृषि ज्ञान केन्द्रका अनुसार बाँकेमा कुल ५४ हजार ५२६ हेक्टर खेतीयोग्य जमिनमध्ये ३३ हजार ५७० हेक्टरमा धान खेती हुने गरेको छ। यस वर्ष भने ३३ हजार ५०३ हेक्टर क्षेत्रफलमा धान रोपाइँ भएको छ।
किसानका लागि अहिले दसैँको खुसीभन्दा पाकेको धान सुरक्षित रूपमा घर पुर्याउनु ठूलो प्राथमिकता बनेको छ। वर्षाले बालीमा क्षति नगरे यस वर्षको मेहनतले राम्रो प्रतिफल दिने उनीहरूको आशा छ।
