काठमाडौं । भारत, चीन, अमेरिका र बेलायतका लागि प्रस्तावित नेपाली राजदूतहरूको संसदीय सुनुवाइ आज सोमबार हुँदैछ। सङ्घीय संसद्को संसदीय सुनुवाइ समितिले बिहान ९ः१५ बजे सार्वजनिक लेखा समितिको सभाहलमा सुनुवाइ गर्ने कार्यतालिका बनाएको छ।
समितिले असोज २३ गते सूचना जारी गर्दै आफ्नो १७औँ बैठकमा प्रस्तावित राजदूतहरूको सुनुवाइ गर्ने र उनीहरूविरुद्ध परेका उजुरीमाथि छलफल गर्ने तय गरेको थियो।
आजको बैठकमा राजदूतका लागि प्रस्तावित व्यक्तिहरूविरुद्ध उजुरी दिने उजुरीकर्तालाई समेत आमन्त्रण गरी उनीहरूले उठाएका विषयमा छलफल गरिनेछ।
सरकारले भारतका लागि डा. निश्चल नाथ पाण्डे, चीनका लागि कल्याण राज शर्मा, अमेरिकाका लागि चिरन जङ्ग थापा र बेलायतका लागि गौरव शमशेर जबरालाई राजदूतमा प्रस्ताव गरेको छ।
संसदीय सुनुवाइ प्रक्रिया पूरा भएपछि प्रस्तावित राजदूतहरूको नियुक्तिसम्बन्धी प्रक्रिया अघि बढ्नेछ।
