विराटनगर- मोरङको रतुवामाई नगरपालिकामा करेन्ट लागेर नेपाल विद्युत प्राधिकरणका कर्मचारीको मृत्यु भएको छ।
विद्युतको पोल मर्मतका क्रममा करेन्ट लागेर नेपाल विद्युत प्राधिकरण रंगेली वितरण केन्द्रमा कार्यरत ४६ वर्षीय सुर्जानन्द मण्डलको मृत्यु भएको जिल्ला प्रहरी कार्यालय मोरङले जनाएको छ।
प्रहरीका अनुसार बिहीबार दिउँसो करिब १:२० बजे रतुवामाई नगरपालिका-१ हटियाडाँडा स्थित विद्युत पोलमा चढेर मर्मत कार्य गर्ने क्रममा उनलाई करेन्ट लागेको थियो।
रतुवामाई नगरपालिका-४ सिंघारी निवासी मण्डललाई उपचारका लागि रंगेली अस्पताल लगिएकोमा उपचारका क्रममा चिकित्सकले दिउँसो २:३० बजे मृत घोषणा गरेका हुन्।
उनको शव रंगेली अस्पतालमै राखिएको तथा घटनाबारे थप अनुसन्धान भइरहेको प्रहरीले जनाएको छ।
