विराटनगर । यातायात कार्यालय, सवारी अनुमति पत्र पर्साका तत्कालीन अधिकृत कमलराज गौतम अकुत सम्पत्ति आर्जनसम्बन्धी भ्रष्टाचार मुद्दामा दोषी ठहर भएका छन्।
विशेष अदालतले उनलाई १ वर्ष कैद सजाय र १ करोड ८ लाख १ हजार ८३८ रुपैयाँभन्दा बढी जरिवाना गर्ने फैसला सुनाएको छ।
विशेष अदालतका अध्यक्ष सुदर्शनदेव भट्ट तथा सदस्यहरू डिल्लीरत्न श्रेष्ठ र विदुर कोइरालाको इजलासले उक्त फैसला सुनाएको हो। अदालतले गैरकानूनी रूपमा आर्जन गरिएको बिगो बराबरको सम्पत्ति जफत गर्ने आदेश समेत दिएको छ।
यस्तै,‘अपराध पीडित संरक्षण ऐन, २०७५’ अनुसार गौतमबाट ४ लाख ३२ हजार ७३ रुपैयाँ पीडित राहत कोषमा जम्मा गराउनुपर्ने आदेश पनि अदालतले दिएको छ।
फैसलाअनुसार अदालतले गौतमको २०५५ वैशाख ६ गतेदेखि २०७९ चैत २४ गतेसम्मको आय–व्यय विश्लेषण गरेको थियो।
विश्लेषणका क्रममा उनको कुल वैध आय ३ करोड ४७ लाख ८६ हजार ३८२ रुपैयाँ ३१ पैसा रहेको र कुल व्यय ४ करोड ५५ लाख ८८ हजार २२० रुपैयाँ ५५ पैसा पुगेको देखिएको थियो।
वैध आयभन्दा व्यय १ करोड ८ लाख १ हजार ८३८ रुपैयाँ २४ पैसा बढी देखिएपछि उक्त रकम बराबरको सम्पत्ति गैरकानूनी रूपमा आर्जन गरिएको अदालतले ठहर गरेको हो।
अख्तियार दुरुपयोग अनुसन्धान आयोगले गौतमले सेवामा रहँदा पदीय मर्यादाविपरीत गैरकानूनी रूपमा सम्पत्ति आर्जन गरेको आरोप लगाउँदै मुद्दा दायर गरेको थियो।
आयोगका अनुसार अनुसन्धानका क्रममा २०५५ सालमा सेवा प्रवेश गरेका गौतमले २०७९ चैतसम्मको अवधिमा वैध आयभन्दा २ करोड ५१ लाख ७८ हजार ६८७ रुपैयाँ ७१ पैसा बराबरको स्रोत नखुलेको सम्पत्ति आर्जन गरेको देखिएको थियो।
मुद्दामा गौतमकी पत्नी सरला नेपाललाई सम्पत्ति जफत प्रयोजनका लागि प्रतिवादी बनाइएको थियो।
अख्तियारले गैरकानूनी रूपमा आर्जन गरिएको सम्पत्ति श्रीमतीको नाममा राखी सम्पत्ति विवरणमा लुकाइएको आरोप लगाएको थियो।
