विराटनगर- सुनसरीको दुहवी नगरपालिकाले आगामी आर्थिक वर्ष २०८३/८४ का लागि ९७ करोड ६६ लाख रुपैयाँको बजेट प्रस्तुत गरेको छ। बिहीबार भएको १९ औं नगरसभामा उपमेयर मेनुका पोखरेल खतिवडाले सो आकारको बजेट प्रस्तुत गरेकी हुन्।
नगरपालिकाले चालु खर्चतर्फ २४ करोड ७० लाख रुपैयाँ, पुँजीगत खर्चतर्फ ४४ करोड ६६ लाख रुपैयाँ बजेट विनियोजन गरेको छ। यस्तै संघीय सशर्त अनुदानतर्फ २९ करोड १८ लाख रुपैयाँ र प्रदेश सशर्त अनुदानतर्फ १ करोड १२ लाख रुपैयाँ छुट्याइएको छ।
नगरपालिकाले चालु आर्थिक वर्ष २०८२/८३ का लागि ९८ करोड ७७ लाख रुपैयाँको अनुमानित बजेट ल्याएकोमा संशोधित आय अनुमान ७२ करोड ४९ लाख रुपैयाँ रहेको उपमेयर खतिवडाले जानकारी दिइन्।
उनका अनुसार कुल बजेटमा चालु खर्चतर्फ ५१ करोड १४ लाख रुपैयाँ र पुँजीगत खर्चतर्फ १४ करोड २८ लाख रुपैयाँ खर्च भएको छ। संशोधित खर्चमा ९० प्रतिशत भौतिक तथा वित्तीय प्रगति भएको नगरपालिकाले जनाएको छ।
नगरसभामा बोल्दै मेयर वेदनारायण गच्छदारले स्रोतको अभावका बीच नगरपालिकाले विकास काममा कुनै कसर बाँकी नराखेको बताए। वर्तमान संघीय सरकारले स्थानीय तहलाई थप दायित्वको भार पर्ने गरी बजेट कटौती गरेको भन्दै उनले असन्तुष्टि व्यक्त गरे।
त्यस्तै उपमेयर मेनुका पोखरेल खतिवडाले नगरपालिकाले मानवीय विकासलाई उच्च प्राथमिकतामा राखेर काम गरेको बताइन्। उनले नगर क्षेत्रमा बसोबास गर्ने मुसहर समुदायको हितका लागि नगरपालिकाले उनीहरूको शैक्षिक विकासमा सघाउ पुग्ने गरी कार्यक्रम गरिएको बताइन्।
त्यस्तै प्रमुख प्रशासकीय अधिकृत सुवर्ण घिमिरेले नगरपालिका तथा मातहतका कार्यालयमा कार्यरत कर्मचारीहरूको अनुशासन र लगनका कारण सार्वजनिक सेवा प्रवाह प्रभावकारी बनेको बताए।
नगरसभामा नगरपालिका तथा मातहतका कार्यालयमा कार्यरत उत्कृष्ट कार्यसम्पादन गर्ने कर्मचारी नगद र कदरपत्रसहित पुरस्कृत भएका छन्।
अधिकृत छैटौं अजयकुमार गौतम, जनस्वास्थ्य निरीक्षक संगीताकुमारी चौधरी, लेखापाल पर्शुराम माझी, नगरप्रहरीका सई अर्जुन देव, असई सञ्जय चौधरी र कार्यालय सहयोगी मिनाकुमारी बस्नेत जनही १५ हजार रुपैयाँ नगदसहित पुरस्कृत भएका छन्।
यस्तै विपद् तथा फोहर व्यवस्थापनमा उत्कृष्ट कार्यसम्पादन गर्ने कर्मचारी पनि पुरस्कृत भएका छन्। टिपर चालक चन्दन रौनियार, जेसीबी चालक भुवन श्रेष्ठ, ट्र्याक्टर चालक रामनारायण साह र वारुणयन्त्र चालक जितेन्द्र गच्छदार जनही ५ हजार रुपैयाँ नगदसहित पुरस्कृत भएका हुन्।
नगरसभामा नगरपालिका तथा वडाका जनप्रतिनिधि, नगरपालिका तथा वडामा कार्यरत कर्मचारी र सरोकारवाला स्थानीयको उपस्थिति थियो।
