विराटनगर । काठमाडौं महानगरपालिका-६ मा सञ्चालित बुद्ध दर्शन सेभिङ एन्ड क्रेडिट कोअपरेटिभ लिमिटेडले ३४ जना बचतकर्ताको बचत रकम फिर्ता गरेको छ।
महानगरपालिका सहकारी विभागको रोहवरमा सहकारीले बचत फिर्ता प्रक्रिया अघि बढाएको हो।
सहकारी विभागका अनुसार संस्थाले आज एक लाख ५० हजारसम्म बचत गरेका ७० जना बचतदाता सदस्यलाई रकम फिर्ता गरेको छ। साथै आगामी एक महिनाभित्र पाँच लाखसम्म बचत गर्ने बचतकर्ताको रकम पनि फिर्ता गर्ने योजना बनाइएको छ।
विभाग प्रमुख ध्रुवकुमार काफ्लेले मागदाबीसहित निवेदन लिने, बचतकर्ता र सञ्चालकबीच छलफल तथा मिलापत्र गराउने, साथै ऋणीलाई एसएमएस, रजिष्ट्री पत्र र सार्वजनिक सूचनामार्फत ऋण चुक्ता गर्न अनुरोध गरिने जानकारी दिए।
वडास्तरमा समस्या समाधान नभए विभागले थप पहल गर्ने तथा सञ्चालक सम्पर्कमा नआए कारबाहीका लागि सिफारिस गरिने विभागले जनाएको छ। ऋणीले ऋण नतिरे सम्बन्धित निकायमा कारबाहीका लागि सिफारिस पठाइने व्यवस्था रहेको छ।
यस प्रक्रियामार्फत बचत रकम एकमुष्ट वा किस्ताबन्दीमा फिर्ता हुने गरेको विभागले जनाएको छ।
