काठमाडौं – प्रधानमन्त्री तथा मन्त्रिपरिषद् कार्यालय परिसरमा सञ्चारकर्मीलाई भिडियो खिच्न अवरोध गरिएको भन्ने समाचारप्रति प्रधानमन्त्रीका प्रेस सल्लाहकार दीपा दाहाल ले आपत्ति जनाएकी छन्।
उनले उक्त विषयलाई असत्य र अतिरञ्जित रूपमा प्रस्तुत गरिएको दाबी गर्दै वास्तविकता फरक रहेको स्पष्ट पारेकी छन्।
सोमबार प्रधानमन्त्री तथा मन्त्रिपरिषद् कार्यालयले जारी गरेको प्रेस नोटमा प्रधानमन्त्री वालेन्द्र शाहले सञ्चारकर्मीलाई भिडियो खिच्न रोक्ने कुनै निर्देशन नदिएको उल्लेख गरिएको छ।
प्रेस सल्लाहकार दाहालका अनुसार प्रधानमन्त्री कार्यालय प्रवेश गर्ने क्रममा परिसरमा सवारी साधनको अत्यधिक भीड देखिएपछि प्रधानमन्त्रीले सुरक्षाकर्मीलाई सामान्य व्यवस्थापन र सुरक्षा सतर्कताबारे मात्र जिज्ञासा राखेका थिए।
यस विषयलाई लिएर बाहिर आएको समाचारले भ्रम सिर्जना गरेको भन्दै सचिवालयले यथार्थ बुझेर मात्रै सूचना सम्प्रेषण गर्न आग्रह गरेको छ।
