काठमाडौं । भारतले लिपुलेक पास हुँदै कैलाश मानसरोवर जाने यात्रा खुला गरेको विरोधमा काठमाडौंमा प्रदर्शन भएको छ।
संयुक्त विद्यार्थी संगठनले सोमबार माइतीघरमा भेला भएर भारतको उक्त निर्णयको विरोध गरेका हुन्। प्रदर्शनकारीहरूले लिपुलेक क्षेत्र नेपालको भूभाग भएको दाबी गर्दै भारतको कदमप्रति आपत्ति जनाएका थिए।
यस विषयमा नेपाल सरकार भने आफ्नो अडानमा स्पष्ट देखिएको छ। सरकारले उक्त यात्रा सञ्चालन हुने क्षेत्र नेपालको भएको दोहोर्याउँदै आफ्नो भौगोलिक अखण्डताप्रति प्रतिबद्ध रहेको जनाएको छ।
भारतले केही दिनअघि लिपुलेक मार्ग हुँदै कैलाश मानसरोवर यात्रा खुला गरेको घोषणा गरेको थियो। भारतीय पक्षका अनुसार सन् २०२६ को जुनदेखि अगस्टसम्म यात्रा सञ्चालन हुनेछ।
यसैबीच, परराष्ट्र मन्त्रालयले कूटनीतिक नोट पठाउँदै उक्त विवादित भू–भागमा कुनै पनि गतिविधि नगर्न दुवै छिमेकी देश भारत र चीनलाई आग्रह गरेको छ।
उता भारतले भने उक्त मार्ग पुरानै यात्राको हिस्सा भएको दाबी गरेको छ। भारतीय विदेश मन्त्रालय द्वारा जारी विवरणअनुसार यस वर्ष २० समूहलाई यात्रामा सहभागी गराइनेछ, जसमा १० समूह उत्तराखण्ड हुँदै लिपुलेक पासबाट र अन्य १० समूह सिक्किमको नाथु ला पासबाट जानेछन्। प्रत्येक समूहमा ५० जना यात्रु रहने बताइएको छ।
