काठमाडौं – नेपाल स्टक एक्सचेन्ज (नेप्से) परिसूचक बिहीबार पनि घटेर बन्द भएको छ।
अघिल्ला तीन दिनदेखि जारी गिरावटलाई निरन्तरता दिँदै नेप्से १७.०१ अंकले घटेर २७८७.१५ विन्दुमा पुगेको छ। यससँगै १० कारोबार दिनपछि नेप्से फेरि २८०० विन्दुभन्दा तल झरेको हो।
सेन्सेटिभ इन्डेक्स, फ्लोट इन्डेक्स र सेन्सेटिभ फ्लोट इन्डेक्स पनि घटेका छन् भने कारोबार रकम पनि कम भएको छ। बुधबारको तुलनामा बिहीबार कम कारोबार भएको छ।
बजार घटेको दिन पनि केही कम्पनीको शेयर भने बढेको छ। पाल्पा सिमेन्ट इन्डस्ट्रिज र शिखर पावर डेभलपमेन्टको शेयरमा सकारात्मक सर्किट लागेको छ भने कर्पोरेट डेभलपमेन्ट बैंकको शेयर पनि झन्डै ९.५ प्रतिशतले बढेको छ।
तर, अघिल्ला दिनमा लगातार बढिरहेको सूर्यकुण्ड हाइड्रो इलेक्ट्रिकको शेयर भने सबैभन्दा धेरै, करिब ११.७९ प्रतिशतले घटेको छ।
कारोबार रकमका आधारमा रिलायन्स स्पिनिङ मिल्स शीर्ष स्थानमा रहेको छ। साथै, सोलु हाइड्रोपावर, आँखुखोला जलविद्युत र होटल फरेस्ट इनमा पनि उच्च कारोबार भएको छ।
कुल १३ उपसमूहमध्ये ११ वटामा गिरावट आएको छ भने उत्पादन तथा व्यापार समूहमा सामान्य वृद्धि देखिएको छ। होटल तथा पर्यटन समूहमा सबैभन्दा धेरै गिरावट देखिएको छ।
