काठमाडौं । विशेष अदालतले पोखरा अन्तर्राष्ट्रिय विमानस्थल निर्माणमा भएको भनिएको भ्रष्टाचार मुद्दामा पूर्वअर्थमन्त्री डा. रामशरण महतविरुद्धको मुद्दा मुल्तवी राख्न अस्वीकार गरेको छ।
डा. महतको स्वास्थ्य अवस्थालाई आधार बनाएर उनकी पत्नी रोशना महतले मुद्दा मुल्तवीको माग गर्दै निवेदन दिएकी थिइन्। तर विशेष अदालतले डा. महत अदालतमा उपस्थित भएको अवस्थामा स्वास्थ्य अवस्थासमेत विचार गरी इजलासबाट आवश्यक आदेश हुन सक्ने भएकाले हाल मुद्दा मुल्तवी राख्न नमिल्ने आदेश दिएको हो।
मुलुकी फौजदारी कार्यविधि संहिता, २०७४ को दफा १२८ अनुसार होसठेगानामा नरहेको व्यक्तिले आफ्नो प्रतिरक्षा गर्न नसक्ने अवस्थामा चिकित्सकको परीक्षणपछि मुद्दा मुल्तवी राख्न सकिने कानुनी व्यवस्था रहेको छ। सोही आधारमा निवेदन दिइएको भए पनि अदालतले हालका लागि माग अस्वीकार गरेको हो।
अख्तियार दुरुपयोग अनुसन्धान आयोगले गत मंसिरमा पोखरा अन्तर्राष्ट्रिय विमानस्थल निर्माणमा ८ अर्ब ३६ करोड रुपैयाँ बराबरको भ्रष्टाचार भएको दाबी गर्दै ५६ जनाविरुद्ध विशेष अदालतमा मुद्दा दायर गरेको थियो।
उक्त मुद्दामा पूर्वमन्त्रीहरू रामकुमार श्रेष्ठ, भीमप्रसाद आचार्य, दीपकचन्द्र अमात्य, डा. रामशरण महत तथा दिवंगत पोष्टबहादुर बोगटीकी पत्नी राममाया बोगटी लगायतलाई प्रतिवादी बनाइएको छ। उक्त मुद्दा हाल विशेष अदालतमा विचाराधीन छ।
