विराटनगर । विराटनगरमा जारी ३८औं संस्करणको नोबेल विराट गोल्डकप समापनसम्म आइपुग्दा विवादै विवादले घेरिएको छ । आयोजक विराट गोल्डकप ट्रस्टको बदमासी, नचाहिँदो ‘चाकडी’ का कारण ऐतिहासिक मानिएको रात्रिकालीन गोल्डकप विवादित बनेको हो ।
गोल्डकपको फाइनलमा पुगेको सम्राट स्पोर्टिङ क्लबका अध्यक्ष तथा राष्ट्रिय खेलकुद परिषद्का पूर्वकेन्द्रीय सदस्य किरण गिरीले सामाजिक सञ्जाल फेसबुकमा आयोजकप्रति चरम असन्तुष्टि पोखेका छन् ।
शनिबार साँझ हुने फाइनल खेल वर्षाका कारण स्थगन गरी आइतबार (आज) का लागि सारेको आयोजकले घरेलु टिमका खेलाडीहरूलाई होटलबाटै खेलाएको भन्दै गिरीले असन्तुष्टि व्यक्त गरेका हुन् ।
उनले आयोजकलाई दलालको संज्ञा दिँदै मोरङ फुटबलमा दलाली भइरहेको बताएका छन् । साथै, उनले ‘सबैको हिसाब-किताब हुन्छ’ भन्दै चेतावनीसमेत दिएका छन् ।
गिरीले लेखेका छन्, ‘मोरङ फुटबलका ठालुहरूको हैसियत देखियो ! दलाल ! सबैको हिसाब किताब हुन्छ ।’
फाइनल खेलपश्चात पत्रकार सम्मेलन नै गरेर घटनाक्रम सार्वजनिक गर्ने र सबैको ‘दलाली’ पर्दापास गर्ने चेतावनी पनि उनको छ ।
उनको क्लब सम्राट स्पोर्टिङ पहिलो सहभागितामै ऐतिहासिक सफलता हात पार्दै फाइनल पुगेको छ । उसले शनिबार साँझ नै उपाधिका लागि साविक विजेतासमेत रहेको झापा ११ सँग खेल्नुपर्ने थियो ।
तर, वर्षातका कारण मैदानमा पानी जमेका कारण फाइनल खेल आजका लागि धकेलिएको थियो । जसपछि टिकट किनेर छतबिनाको स्टेडियममा रुझ्दै भए पनि फाइनल हेर्ने मनस्थिति बनाएका दर्शकहरू निराश हुँदै घर फर्किएका थिए ।
कतिले त मैदान बनाउन लिएको बजेटजति ‘झ्वाम’ पारेका कारण मैदान हिलाम्मे हुन पुगेको भन्दै सामाजिक सञ्जालमा विरोधसमेत गरेका थिए । अझ फाइनलमै संघ र प्रदेशको खेलकुद क्षेत्रका विभागीग मन्त्रीलाई नबोलाएर खेल क्षेत्रसँग सम्बन्ध भएका वर्तमान सभामुख डिपी अर्याललाई प्रमुख अतिथि बनाउँदै भाषण गर्न लगाएको भन्दै धेरैले विरोध गरेका थिए ।
