दुहबी । दुहबी नगरपालिकाले सुनसरी-मोरङ औद्योगिक करिडोरअन्तर्गतका उद्योगहरूमा अनुगमन गरेको छ । नगरकी उपप्रमुख मेनुका पोखरेल खतिवडा संयोकत्वको टोलीले आइतबार दुहबीभित्रका नौ वटा उद्योगहरूको अनुगमन गरेको हो ।
नगरभित्र पर्ने ट्यांग्रा खोलाको पानी दूषित भएको भनेर स्थानीयको गुनासो आएपछि अनुगमन समितिकी संयोजक पोखरेल नेतृत्वको टोलीले अनुगमन गरेको दुहबी नगरपालिकाको वातारवरण शाखा विमल नारायण चौधरीले जानकारी दिए ।
उनका अनुसार दुहबी-८ मा पर्ने स्वदेशी साबुन प्रा.लि., एशियन थाई फुड प्रा.लि, पशुपति सिनप्याक इन्डस्ट्रिज र न्युट्री फुड्स इन्डस्ट्रिज अनुगमन भएको थियो । यस्तै दुहबी-२ शुभलक्ष्मी फूड प्रडक्सन, एसटी कार्पेट र मैनावत्ति स्टिल्स, एसियन बिस्कुट एन्ड कन्फिक्नेरीको अनुगमन भएको थियो भने दुहबी-३ मा जितेन्द्र चामल उद्योगमा अनुगमन भएको थियो ।
नौमध्ये न्युट्री फुड्स इन्डस्ट्रिजबाहेक अन्य आठ वटा उद्योगले फालेको पानीको नमुना संकलन गरी परीक्षणका लागि मोरङ ब्यापार संघभित्र नेपाल वातावरणीय परीक्षण सेवामा पठाएको उनको भनाइ छ ।
अनुगमनपछि बोल्दै उपमेयर पोखरेलले आफ्नै संयोजकत्वमा अनि स्थानीय, जनप्रतिनिधि र सञ्चारकर्मीको रहोबरमा स्याम्पल कलेक्सन भएको जानकारी दिइन् । स्थानीयको गुनासोलाई सम्बोधन गर्नेक्रममा उद्योगहरूलाई पत्राचार गरेपनि उनीहरूलाई थाहा नदिई अनुगमन गरिएको बताउँदै उनले व्यवस्थित र अनुशासित तबरले उद्योग चलाउन प्रेरित गरी यस्तो कदम चालिएको बताइन् ।
परीक्षणको रिपोर्टमा दूषित पानी सीधा खोलामा फालेको पाइएमा कारबाही गर्ने वा सचेत गराउने अनुगमनको उद्देश्य रहेको उनको भनाइ छ । अनुगमनमा उपप्रमुख पोखरेलका अलाबा सम्बन्धित वडाध्यक्षहरू, स्थानीय र सञ्चारकर्मीहरूको सहभागिता रहेको थियो ।
