काठमाडौं – पूर्व गृहमन्त्री रमेश लेखकको बयान जिल्ला सरकारी वकिल कार्यालयमा सुरु भएको छ।
मंगलबार दिउँसोदेखि बयान प्रक्रिया सुरु भएको हो। जिल्ला प्रहरी परिसर काठमाडौंका एक प्रहरी अधिकृतका अनुसार लेखकको बयान जारी रहेको छ।
जिल्ला अदालत काठमाडौंले यसअघि लेखकमाथि ५ दिनको म्याद थप गरेको थियो।
भदौ २३ र २४ गते भएको जेनजी आन्दोलनका क्रममा तत्कालीन गृहमन्त्रीको हैसियतमा गरिएको कामकारबाहीलाई लिएर उनीमाथि प्रश्न उठेको थियो। सो घटनाको छानबिन गर्न गठित आयोगले लेखकलाई अनुसन्धानका लागि सिफारिस गरेको थियो।
लेखकसँगै तत्कालीन प्रधानमन्त्री केपी शर्मा ओलीलाई पनि अनुसन्धान गर्न सिफारिस गरिएको थियो।
उक्त सिफारिसका आधारमा शनिबार बिहान ओली र लेखक दुवै पक्राउ परेका थिए।
