काठमाडौं । नेपाली कांग्रेसको संस्थापन इतर (देउवा) पक्षले सर्वोच्च अदालतको फैसला नआउँदासम्म गगन थापा लाई सभापतिका रूपमा स्वीकार नगर्ने स्पष्ट पारेको छ।विशेष महाधिवेशनबाट निर्वाचित थापा नेतृत्वको केन्द्रीय समितिलाई निर्वाचन आयोग ले वैधता दिए पनि देउवा पक्षले त्यसलाई अस्वीकार गर्दै आएको हो।
पार्टीभित्र अहिले दुई धार स्पष्ट देखिएका छन्। शेरबहादुर देउवा निकट पक्षले समानान्तर गतिविधि अघि बढाउँदै आएको छ भने नेता पूर्णबहादुर खड्काले कार्यवाहक सभापतिको हैसियतमा विज्ञप्ति जारी गर्नुका साथै सांसदहरूलाई प्रशिक्षण कार्यक्रमसमेत सञ्चालन गरिरहेका छन्। धुम्बाराहीमा मंगलबार बसेको देउवा पक्षको भेलापछि नेता मानबहादुर नेपाली ले सर्वोच्च अदालतमा मुद्दा विचाराधीन रहेकाले थापालाई सभापति मान्न नसकिने साझा निष्कर्ष रहेको बताए।
उनले भने, “सर्वोच्च अदालतको फैसला नआउँदासम्म स्वघोषित सभापति गगन थापालाई हामी अस्वीकार गर्छौँ।” भेलामा उपस्थित कुनै पनि नेताले थापालाई सभापतिका रूपमा स्वीकार नगरेको पनि उनले स्पष्ट पारे।
देउवा पक्षले सर्वोच्च अदालतमा दायर गरेको मुद्दामाथि चैत २२ गते सुनुवाइ हुने तय भएको छ। अब कांग्रेसको आन्तरिक शक्ति सन्तुलन र नेतृत्वको वैधता अदालतको फैसलाले निर्धारण गर्ने देखिएको छ।
