काठमाडौँ – काठमाडौँ महानगरपालिकाले विद्यालय उमेरका २० हजार विद्यार्थीहरूको आँखा जाँच तथा प्रारम्भिक उपचारका लागि नेपाल आँखा अस्पताल सँग सम्झौता गरेको छ। कार्यवाहक प्रमुख सुनिता डंगोल र प्रमुख प्रशासकीय अधिकृत सरोज गुरागाईँको रोहवरमा स्वास्थ्य विभाग प्रमुख दीपककुमार के.सी. तथा अस्पतालका प्रमुख कार्यकारी अधिकृत धर्मराज गोसाईँले सम्झौतापत्रमा हस्ताक्षर गरेका हुन्।
सम्झौतापछि डंगोलले पछिल्लो समय बालबालिकामा अत्यधिक मोबाइल प्रयोगका कारण दृष्टि समस्या बढ्न सक्ने भएकाले समयमै पहिचान गरी उपचार गर्ने उद्देश्यले कार्यक्रम सुरु गरिएको बताइन्। उनका अनुसार सामुदायिकसँगै संस्थागत विद्यालयका विद्यार्थीहरूको पनि आँखा परीक्षण गरिनेछ।
सम्झौताअनुसार अस्पतालले विशेषज्ञ चिकित्सकमार्फत कम्तीमा ३० वटा विद्यालयका २० हजार विद्यार्थीहरूको आँखा जाँच गर्नुपर्नेछ। परीक्षणपछि आवश्यक औषधि उपलब्ध गराइनेछ भने आवश्यक परे विद्यार्थीलाई चस्मा समेत प्रदान गरिने व्यवस्था गरिएको छ।
महानगरले यस कार्यक्रमलाई बालस्वास्थ्य प्रवर्द्धनका लागि महत्वपूर्ण पहलका रूपमा लिएको जनाएको छ।
