काठमाडौं — श्रम संस्कृति पार्टीका अध्यक्ष तथा नवनिर्वाचित सांसद हर्क साम्पाङ ले दार्चुलामा तुइनको साटो झोलुङ्गे पुल निर्माणका लागि देशभरका श्रमदातालाई तयार रहन आह्वान गरेका छन्।
सामाजिक सञ्जालमा जारी भिडियो सन्देशमार्फत साम्पाङ ले पुल निर्माण स्थलको दुर्गम भौगोलिक अवस्था र प्राविधिक जानकारी लिन आफूले अग्रिम टोली पठाएको जानकारी दिएका छन्। उनले भने, “मोटर बाटो नपुगेको उक्त दुर्गम स्थानमा डोजर, क्रसर र अन्य भारी मेसिनरी उपकरण लैजान सम्भव छैन। श्रमदानमा जानेहरूले घन, मार्तोल, बेल्चा, गैँती र झब्बलको भरमा ढुङ्गा फुटाउनेदेखि बाटो खन्नेसम्मको काम हातैले गर्नुपर्नेछ।”
साम्पाङले पुल निर्माण सम्पन्न गर्न करिब १५–२० दिन समय लाग्ने जानकारी दिएका छन्। साथै, सहयोगी दाताहरूलाई न्यूनतम १० रुपैयाँदेखि माथि आफ्नो क्षमता अनुसार योगदान गर्न आग्रह समेत गरेका छन्।
