काठमाडौं । मध्यपूर्व क्षेत्रमा इजरायल–अमेरिका र इरानबीच बढेको सैन्य तनाव अझै कम भएको छैन। मिसाइल तथा हवाई आक्रमण जारी रहँदा खाडी मुलुकहरूमा रहेका नेपालीहरूको सुरक्षाबारे चिन्ता बढेको छ।
इरानले खाडी क्षेत्रमा रहेका अमेरिकी सैन्य बेस लक्षित गरी मिसाइल आक्रमण गरिरहेकाले साउदी अरब, यूएई, कतार, कुवेत, बहराइन र ओमान लगायत देशमा सुरक्षा जोखिम बढेको छ। सरकारका अनुसार ती देशमा करिब साढे १७ लाख नेपाली काम तथा अध्ययनका लागि रहेका छन्।
परराष्ट्र मन्त्रालयका प्रवक्ता लोकबहादुर पौडेल क्षेत्रीका अनुसार ती क्षेत्रमा रहेका नेपालीहरूको अवस्थाबारे त्यहाँस्थित नेपाली दूतावास र नियोगहरूले निरन्तर निगरानी गरिरहेका छन् र मन्त्रालयलाई नियमित जानकारी पठाइरहेका छन्।
यूएईको अबुधाबीस्थित जायद अन्तर्राष्ट्रिय विमानस्थलमा ड्रोन निष्क्रिय पार्ने क्रममा गोरखाका २९ वर्षीय दिवस श्रेष्ठको मृत्यु भएको थियो। फेब्रुअरी २८ मा इरानले गरेको ड्रोन आक्रमणमा नेपाल, भारत र बंगलादेशका एक–एक जनाको मृत्यु भएको थियो। श्रेष्ठको शव नेपाल ल्याएर परिवारलाई बुझाइएको छ।
मन्त्रालयका अनुसार यूएईमा इरानको आक्रमणमा परी केही नेपाली घाइते भएका छन्। अधिकांश घाइते सामान्य उपचारपछि घर फर्किसकेका छन् भने केही अस्पतालमा उपचाररत छन्।
परराष्ट्र मन्त्रालयले मध्यपूर्व क्षेत्रमा रहेका नेपालीहरूको अद्यावधिक विवरण संकलनका लागि सञ्चालनमा ल्याएको अनलाइन दर्ता प्रणालीमा आइतबारसम्म ५४ हजार ७८६ नेपालीले आफ्नो विवरण दर्ता गरिसकेका छन्। प्राप्त विवरणका आधारमा आवश्यक सहयोगको प्रक्रिया अघि बढाइएको मन्त्रालयले जनाएको छ।
तनाव बढ्दै गएपछि वैदेशिक रोजगार विभागले फागुन १७ देखि लागू हुनेगरी साउदी अरब, यूएई, कतार, कुवेत, बहराइन, ओमान, इराक, यमन, जोर्डन, लेबनान, टर्की र इजरायल जाने श्रमिकलाई प्रदान गरिने श्रम स्वीकृति अर्को निर्णय नभएसम्मका लागि स्थगित गरेको छ। ती देशमा अध्ययनका लागि जाने विद्यार्थीलाई प्रदान गरिने ‘नो अब्जेक्सन सर्टिफिकेट’ (एनओसी) पनि रोकिएको छ।
मध्यपूर्वको अवस्थालाई ध्यानमा राख्दै परराष्ट्र मन्त्रालयले ‘इमर्जेन्सी एक्सन रुम’ स्थापना गरी २४ घण्टा हटलाइन सेवा सञ्चालनमा ल्याएको छ। दूतावास, सम्बन्धित मन्त्रालय तथा नेपाली समुदायसँग समन्वय गरी आवश्यक सहयोग तथा उद्धारका तयारी अघि बढाइएको मन्त्रालयले जनाएको छ।
कतार र कुवेतको आकाश उडानका लागि बन्द भए पनि साउदी अरब र ओमानतर्फ केही उडान पुनः सञ्चालनमा आएका छन्। यूएईमा पनि सीमित उडान सञ्चालनमा छन्। यूएईले उडान ढिला वा बन्द भएका कारण समयमै देश छाड्न नसकेका यात्रुको ओभरस्टे जरिबाना माफी गर्ने निर्णय गरेको छ।
मन्त्रालयले मध्यपूर्वमा रहेका सबै नेपालीलाई संयमित र सचेत रहन, स्थानीय सरकार र नेपाली नियोगले जारी गरेका सूचना पालना गर्न तथा अनावश्यक आवतजावत नगर्न आग्रह गरेको छ। साथै संवेदनशील अवस्थामा फोटो, भिडियो वा अडियो सामग्री खिच्ने तथा सामाजिक सञ्जालमा आदान–प्रदान नगर्न पनि अनुरोध गरेको छ।
हालको परिस्थितिबारे नेपालका प्रधानमन्त्रीले यूएईका राष्ट्रपति र कतारका प्रधानमन्त्रीसँग टेलिफोन संवाद गर्दै त्यहाँ रहेका नेपालीको सुरक्षा र कल्याणबारे छलफल गरेकी छन्। साथै परराष्ट्र मन्त्रालयले विभिन्न देशका नेपाली नियोगका अधिकारीहरूसँग भर्चुअल बैठक गरी आवश्यक समन्वयलाई तीव्रता दिएको जनाएको छ।
