तेहरान — अली खामेनी मारिएपछि उनका छोरा मोज्तबा खामेनी इरानको नयाँ सर्वोच्च नेता नियुक्त भएका छन्।
८८ जना धर्मगुरु सदस्य रहेको विज्ञहरूको सभा ले आइतबार मतदानमार्फत मोज्तबा खामेनीलाई इरान को तेस्रो सर्वोच्च नेता चयन गरेको हो। उक्त सभाले विज्ञप्ति जारी गर्दै नयाँ सर्वोच्च नेता नियुक्त गरिएको पुष्टि गरेको छ।
अन्तर्राष्ट्रिय समाचार संस्था रोयटर्स का अनुसार अमेरिका र इजरायल सँग जारी युद्धकै बीच गरिएको यो निर्णयले इरानमा कट्टरपन्थी शक्तिको पकड अझै मजबुत रहेको संकेत गरेको छ।
इरानमा सर्वोच्च नेताको पदलाई राज्यको सबैभन्दा शक्तिशाली पद मानिन्छ। यस पदमा रहने व्यक्तिसँग देशका सुरक्षा, सैन्य, विदेश नीति तथा प्रमुख राजनीतिक निर्णयमा अन्तिम अधिकार रहने व्यवस्था छ।
मोज्तबा खामेनी लामो समयदेखि इरानको सुरक्षा संयन्त्र र आर्थिक सञ्जालभित्र प्रभावशाली व्यक्तिका रूपमा चिनिँदै आएका छन्। आफ्ना पिता अली खामेनीको नेतृत्वमा रहेको शक्तिशाली संरचनाभित्र उनी प्रभावशाली भएकाले सम्भावित उत्तराधिकारीका रूपमा पहिलेबाटै चर्चामा थिए।
यसैबीच डोनाल्ड ट्रम्पले इरानमा नयाँ सर्वोच्च नेता चयनमा अमेरिकाको पनि भूमिका हुनुपर्ने धारणा राख्दै आएका थिए। अली खामेनी मारिएपछि उनले इरानी जनतालाई सत्ता नियन्त्रणमा लिन अपिलसमेत गरेका थिए।
ट्रम्पले इरानको नयाँ नेतृत्व अमेरिकाले स्वीकार गर्न सक्ने हुनुपर्ने बताउँदै त्यसो नभए नयाँ नेतृत्व धेरै समय टिक्न नसक्ने टिप्पणी गरेको रोयटर्सले जनाएको छ।
उता इजरायलले भने नयाँ सर्वोच्च नेता चयन हुनुअघि नै जोसुकै नेता बने पनि उसलाई निशाना बनाउन सकिने चेतावनी दिएको थियो।
