काठमाडौं — राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले दलीय राजनीतिबाट तत्कालका लागि विदा लिने घोषणा गरेका छन्।
मिश्रले आज प्रेस विज्ञप्ति जारी गर्दै पार्टीका सम्पूर्ण जिम्मेवारीबाट राजीनामा दिएको जानकारी दिएका हुन्। उनले राजसंस्था पुनर्स्थापना लगायतका आफ्ना राजनीतिक अडान भने यथावत रहने र तत्कालका लागि स्वतन्त्र रूपमा आफ्ना विचार राख्दै जाने बताएका छन्।
देशभर राजसंस्था पुनर्स्थापनाको पक्षमा जनमत बढ्दो देखिए पनि त्यसलाई संगठित गर्न पार्टी बारम्बार असफल भएको उल्लेख गर्दै उनले त्यसको जिम्मेवारी आफूले पनि लिने बताएका छन्।
मिश्रले आफ्नो ९ वर्षको राजनीतिक यात्रामा देशका लागि इमानदारीपूर्वक प्रयास गरेको उल्लेख गर्दै अब गैरदलीय रूपमा राजनीतिक धारणा राख्ने बताएका छन्।
उनले प्रतिनिधिसभा निर्वाचनमा सफलता हासिल गरेको राष्ट्रिय स्वतन्त्र पार्टी लाई बधाईसमेत दिएका छन्।
