काठमाडौं— प्रहरी महानिरीक्षक दानबहादुर कार्कीले आसन्न निर्वाचनलाई शान्तिपूर्ण, भयरहित र निष्पक्ष बनाउन सम्पूर्ण सुरक्षा तयारी पूरा भएको बताएका छन्। मौन अवधिको समयमा सामाजिक सञ्जाल दुरुपयोग गर्ने वा निर्वाचन आचारसंहिता विपरीत गतिविधि गर्नेलाई तत्काल कानुनी दायरामा ल्याइने उनले स्पष्ट पारे।
मौन अवधिको पूर्ण पालना गर्न राजनीतिक दल तथा सरोकारवालालाई आग्रह गर्दै उनले यस अवधिमा सुरक्षा निगरानी कडा पारिएको जानकारी दिए। “मौन अवधिमा सामाजिक सञ्जालको दुरुपयोग गर्नेलाई हामीले कानुनी दायरामा ल्याएका छौं,” उनले भने, “निर्वाचन आचारसंहिता विपरीत हुने गतिविधिलाई सबै सुरक्षा निकायले एकीकृत रूपमा व्यवस्थापन गरिरहेका छन्।”
उनका अनुसार निर्वाचन सुरक्षाका लागि नेपाली सेना, नेपाल प्रहरी, सशस्त्र प्रहरी बल र राष्ट्रिय अनुसन्धान विभाग समन्वयात्मक रूपमा परिचालित छन्। गृह मन्त्रालयको प्रत्यक्ष नेतृत्वमा सूचना सङ्कलन, संयुक्त गस्ती तथा तत्काल सम्बोधनका काम भइरहेको उनले बताए।
कुनै पनि मतदान केन्द्र कब्जा गर्न खोज्ने, मतदातालाई धम्क्याउने वा निर्वाचन प्रक्रियामा अवरोध पुर्याउने गतिविधि सह्य नहुने चेतावनी दिँदै उनले आवश्यक परे कानुनअनुसार बल प्रयोग गरिने उल्लेख गरे।
सुरक्षा संयन्त्रले शान्तिपूर्ण मतदानको वातावरण तयार गरिसकेको दाबी गर्दै महानिरीक्षक कार्कीले आम मतदातालाई ढुक्क भएर मतदानमा सहभागी हुन अपिल गरेका छन्।
