काठमाडौं – राष्ट्रिय स्वतन्त्र पार्टी (रास्वपा) का नेता बालेन्द्र शाहले आफ्नो चुनावी घोषणापत्र सार्वजनिक गरेका छन्। झापा क्षेत्र नं. ५ बाट प्रतिनिधिसभा सदस्यका उम्मेदवार रहेका शाहले घोषणापत्रलाई ‘झापा–५ वाचापत्र’ नाम दिएका छन्।
शाहले सङ्घीय सांसदको हैसियतले गर्ने कामहरू वाचापत्रमा समेटेका छन्। ‘मेरो प्रतिबद्धता’ शीर्षकअन्तर्गत शिक्षा, पूर्वाधार, कृषि तथा रोजगारी, महिला तथा बालबालिका र पर्यटन तथा उद्योग क्षेत्रका योजनाहरू उल्लेख गरिएको छ। त्यसैगरी खेलकुद, स्वास्थ्य, भूमि व्यवस्थापन, वातावरण, सुशासन तथा कला–संस्कृतिका क्षेत्रमा गर्ने कार्यहरू बुँदागत रूपमा प्रस्तुत गरिएको छ।
वाचापत्रमा उनले स्थानीय तथा प्रदेश सरकारलाई संवैधानिक अधिकारको प्रत्यायोजन सुनिश्चित गर्न महत्त्वपूर्ण भूमिका निर्वाह गर्ने उल्लेख गरेका छन्। रास्वपाको सरकार गठन भएमा स्थानीय, प्रदेश र सङ्घीय सरकारबीच समन्वय र सहकार्य गर्दै पाँच वर्षभित्र वाचापत्रमा उल्लिखित कार्यक्रमहरू कार्यान्वयन गर्ने प्रतिबद्धता व्यक्त गरेका छन्।
शाहले राजनीतिलाई पेशा नभई सेवा ठान्ने स्पष्ट पार्दै बेथिति र भ्रष्टाचारविरुद्ध संसद्मा सशक्त रूपमा उभिने अठोट व्यक्त गरेका छन्। राष्ट्रहितविपरीत कुनै सम्झौता नगर्ने र सार्वजनिक सेवालाई प्रभावकारी तथा पारदर्शी बनाउने प्रतिबद्धता पनि उनले जनाएका छन्।
