काठमाडौं । नेपाली कांग्रेसले प्रतिनिधि सभा निर्वाचनका लागि सार्वजनिक गरेको प्रतिज्ञापत्रमा समेटिएका विषयबारे आज (बिहीबार) खुला प्रश्नोत्तर कार्यक्रम आयोजना गर्ने भएको छ।
बुधबार जनकपुरमा सार्वजनिक गरिएको प्रतिज्ञापत्रबारे पार्टी सभापति गगनकुमार थापाले काठमाडौंस्थित राष्ट्रिय सभागृहमा प्रश्नोत्तर गर्ने कार्यक्रम तय भएको हो।
दिउँसो १ बजेदेखि सुरु हुने ‘हाम्रो प्रतिज्ञा, तपाईंको प्रश्न’ कार्यक्रममा देश–विदेशबाट प्रत्यक्ष रूपमा प्रश्न सोध्न सकिने व्यवस्था गरिएको छ। कांग्रेसका प्रवक्ता देवराज चालिसेका अनुसार प्रविधिको प्रयोगमार्फत विश्वभरिबाट प्रश्न लिइनेछ र सभापति थापाले प्रत्यक्ष जवाफ दिनेछन्।
कांग्रेसले आफ्नै नेतृत्वमा सरकार गठन भए आगामी पाँच वर्षमा गर्ने कामको खाका प्रतिज्ञापत्रमार्फत सार्वजनिक गरेको छ। कार्यक्रमको विभिन्न सञ्चार माध्यमबाट प्रत्यक्ष प्रसारणसमेत हुने जनाइएको छ।
