सुनसरी निर्वाचन क्षेत्र नं. ३ की प्रतिनिधिसभा सदस्यकी उम्मेदवार भगवती चौधरीले आफ्नो क्षेत्रलाई मुलुककै उत्कृष्ट नमुना क्षेत्रका रूपमा विकास गर्ने लक्ष्य प्रस्तुत गर्दै मतदातासँग समर्थन मागेकी छन् ।
नेकपा एमालेकी नेतृ चौधरीले इटहरीमा प्राध्यापक, बुद्धिजीवी तथा समाजसेवीहरूसँग भएको अन्तरक्रिया कार्यक्रममा सुनसरी–३ लाई मुलुककै उत्कृष्ट नमुना क्षेत्र बनाउने लक्ष्य लिएको बताएकी छन् । पूर्वमन्त्रीसमेत रहेकी चौधरीले विगत साढे तीन वर्षमा करिब सवा अर्ब रुपैयाँ बराबरको विकास बजेट भित्र्याएको पनि उल्लेख गरिन् ।
२०७९ को संसदीय निर्वाचन जितेर मन्त्री बनेपछि सडक, पुललगायतका पूर्वाधार योजनामा उल्लेख्य प्रगति भएको बताउँदै उनले अरू थप योजना कार्यान्वयनको चरणमा रहेको सुनाइन् । आसन्न प्रतिनिधिसभा सदस्य निर्वाचनमा विजयी भएमा अधुरा योजनालाई पूर्णता दिने उनको प्रतिबद्धता छ ।
साथै, शिक्षा–स्वास्थ्यको गुणस्तर सुधार गर्ने, खानेपानी तथा कृषि क्षेत्रमा लगानी बढाउने र युवाका लागि स्थानीयस्तरमै रोजगारी सिर्जना गर्ने उनले बाचा व्यक्त गरिन् । ग्रामीण उद्योगमार्फत कम्तीमा ५ हजार युवालाई स्वरोजगार बनाउने लक्ष्यसमेत उनले अघि सारेकी छन् ।
त्यसबाहेक चौधरीले क्षेत्रलाई शिक्षा, स्वास्थ्य, कृषि, पर्यटन र उद्योगका आधारमा वर्गीकरण गरी योजनाबद्ध विकास मोडल कार्यान्वयन गर्ने योजना रहेको बताइन् । साथै केही ठूला उद्योग स्थापना गर्न पहल भइरहेको पनि जानकारी दिइन् ।
कार्यक्रममा सहभागी बुद्धिजीवी तथा समाजसेवीहरूले व्यवहारिक र कार्यान्वयनयोग्य योजना लिएर जनतामाझ जान सुझाव दिएका थिए । कार्यक्रममा तीन दर्जनभन्दा बढी व्यक्तिको सहभागिता रहेको थियो ।
