काठमाडौं । ओपनर जोडी टिम सेफर्ट र फिन एलनले कीर्तिमानी साझेदारी गर्दै न्युजिल्यान्डलाई आईसीसी टी–२० विश्वकपमा युनाइटेड अरब इमिरेट्स (यूएई) विरुद्ध १० विकेटको सानदार जित दिलाएका छन् ।
टी–२० विश्वकप इतिहासमा न्युजिल्यान्डले १० विकेटले जित निकालेको यो पहिलो अवसर हो । समग्रमा हेर्दा विश्वकपमा कुनै पनि टिमले १० विकेटको जित दर्ता गरेको यो छैटौँ पटक हो । यसअघि अस्ट्रेलिया, दक्षिण अफ्रिका, ओमान, पाकिस्तान र इंग्ल्यान्डले यस्तो जित हात पारेका थिए ।
मंगलबार भारतको चेन्नाईस्थित एमए चिदम्बरम रंगशालामा सम्पन्न खेलमा यूएईले दिएको १७४ रनको लक्ष्य न्युजिल्यान्डले आक्रामक ब्याटिङ गर्दै १५.२ ओभरमै कुनै विकेट नगुमाई पूरा गर्यो ।
न्युजिल्यान्डको जितमा टिम सेफर्ट र फिन एलनले सुरुबाटै यूएईका बलरमाथि दबाब बनाए । सेफर्टले ४२ बलमा १२ चौका र तीन छक्कासहित ९ रन बनाए । अर्का ओपनर एलनले ५० बलमा पाँच चौका र पाँच छक्काको मद्दतमा ८४ रनको योगदान दिए ।
यूएईका बलरहरू न्युजिल्यान्डविरुद्ध प्रभाव जमाउन असफल रहे । प्रयोग गरिएका पाँच बलरमध्ये हैदर अलीबाहेक सबैको रनरेट ११ भन्दा माथि रह्यो ।
यसअघि टस जितेर ब्याटिङ रोजेको यूएईले निर्धारित २० ओभरमा ६ विकेट गुमाउँदै १७३ रन बनाएको थियो ।
कप्तान महोम्मद वसिमले सर्वाधिक ६६ रन जोड्दा अलिसन सराफुले अर्धशतक प्रहार गरे । १२–१ को कठिन अवस्थाबाट वसिम र सराफुले १०७ रनको साझेदारी गर्दै यूएईको इनिङ सम्हालेका थिए । मयंक कुमारले २१ रन बनाए भने अन्य ब्याटरहरू दोहोरो अंकमा पुग्न सकेनन् ।
न्युजिल्यान्डका म्याट हेनरीले चार ओभरमा ३७ रन खर्चिँदै दुई विकेट लिए । ज्याकोब डफी, लाकी फर्गुसन, मिचेल सेन्टनर र ग्लेन फिलिप्सले समान एक–एक विकेट हात पारे ।
यो जितसँगै न्युजिल्यान्डले प्रतियोगितामा लगातार दोस्रो जित दर्ता गरेको छ । यसअघि उसले अफगानिस्तानलाई पाँच विकेटले पराजित गरेको थियो । दुई जितपछि न्युजिल्यान्डको सुपर–८ यात्रा थप बलियो बनेको छ । यूएईको भने यो प्रतियोगितामा पहिलो खेल हो ।
