एजेन्सी– गाजा पट्टीमा शनिबार भएको इजरायली हवाई आक्रमणमा कम्तीमा ११ जनाको ज्यान गएको छ। गाजाको स्वास्थ्य मन्त्रालयका अनुसार शरणार्थी शिविरमा आश्रय लिइरहेका नागरिकलाई लक्षित गरी आक्रमण गरिएको हो।
हमास प्राधिकरणअन्तर्गतको स्वास्थ्य मन्त्रालयका महाप्रबन्धक मुनीर अल–बर्शलाई उद्धृत गर्दै एएफपीले आक्रमणमा थप २० जना घाइते भएको जनाएको छ। उनका अनुसार इजरायलले अपार्टमेन्ट र शरणार्थी शिविरमा रहेका सर्वसाधारणलाई लक्षित गरी आक्रमण गरेको हो।
घाइतेहरूलाई उपचारका लागि उत्तरतर्फ गाजा सहर र दक्षिणतर्फ खान युनिसका अस्पतालहरूमा लगिएको अल–बर्शले बताएका छन्।
उनका अनुसार चिकित्सा आपूर्ति, औषधि र स्वास्थ्य उपकरणको गम्भीर अभावका बीच पनि इजरायलले युद्धविराम सम्झौताको गम्भीर उल्लङ्घन जारी राखेको आरोप लगाइएको छ।
अक्टोबरदेखि अमेरिकाको पहलमा सुरु भएको युद्धविराम जनवरीमा दोस्रो चरणमा प्रवेश गरेको थियो। यस चरणमा हमासको निशस्त्रीकरण, इजरायली सेनाको क्रमिक फिर्ती र अन्तर्राष्ट्रिय स्थिरीकरण बलको तैनाती समावेश छ।
तर, इजरायल र हमासले एक–अर्कामाथि युद्धविराम उल्लङ्घन गरेको आरोप लगाउँदै आएका छन्। हमासद्वारा सञ्चालित गाजाको सरकारी प्रेस कार्यालयका अनुसार शनिबारको आक्रमणमा एक विस्थापित परिवारका सात जनाको मृत्यु भएको छ।
गाजाको स्वास्थ्य मन्त्रालयका अनुसार अक्टोबर १० मा युद्धविराम लागू भएयता हालसम्म ५०९ जनाको मृत्यु भइसकेको छ।
