काठमाडौँको मूलपानी क्षेत्रमा लुटेरा समूहलाई नियन्त्रणमा लिने क्रममा प्रहरीले गोली प्रहार गरेको छ। जिल्ला प्रहरी परिसर काठमाडौँको टोलीले गएराति लुटपाटमा संलग्न समूहलाई पक्राउ गर्ने प्रयास गर्दा अवस्था तनावग्रस्त बनेपछि आत्मरक्षाका लागि दुई राउन्ड गोली चलाइएको जनाएको छ।
प्रहरीको गोली लागेर लुटेरा समूहका एक जना घाइते भएका छन्। उनलाई उपचारका लागि ट्रमा सेन्टरमा भर्ना गरिएको छ। घटनामा दुई जना प्रहरीसमेत घाइते भएका छन्।
जिल्ला प्रहरी परिसर काठमाडौँका एसपी रमेश थापाका अनुसार सुरक्षाकर्मीमाथि आक्रमण गर्ने प्रयास भएपछि गोली चलाउनुपरेको हो। प्रहरीले उपत्यकाका विभिन्न क्षेत्रमा लुटपाट मच्चाउँदै आएका १० जनालाई पक्राउ गरेको जनाएको छ।
प्रहरीका अनुसार उक्त समूह गौशाला, स्वयम्भू, बौद्ध र भक्तपुर क्षेत्रमा सक्रिय थियो। पक्राउ परेकाहरूको नाम अनुसन्धान जारी रहेकाले हाल सार्वजनिक नगरिएको प्रहरीले जनाएको छ।
