शनिबार बिहान अमेरिकाको टेक्ससस्थित ड्यालसमा भएको गोलीकाण्डमा नेपालमाबाट पुनर्वासमा गएका तीनजना भुटानी शरणार्थीको ज्यान गएको छ।
सन् २००८/०९ मा शरणार्थी पुनर्स्थापना कार्यक्रमअन्तर्गत ड्यालस आएका ५३ वर्षीय ललित प्रधान, उनकी ३७ वर्षीया पत्नी रजनी श्रेष्ठ प्रधान र ३ वर्षीय छोरा प्रनिश प्रधानको निधन भएको हो ।
समाचारअनुसार ललितले पत्नी र छोरालाई गोली हानेर हत्या गरेपछि आफैंलाई पनि गोली हानेर आत्महत्या गरेका अमेरिकाबाट सञ्चालित हिमालयखबरले उल्लेख गरेको छ।
शनिबार बिहान २ :१० मा घटना भएको जानकारी ड्यालस पुलिस डिपार्टमेन्टलाई मिलेको थियो । प्रहरी घटनास्थलमा पुग्दा रजनी र प्रनिशको गोली लागेर निधन भइसकेको थियो ।
घाइते अवस्थामाका ललितलाई तत्काल अस्पताल लगेपछि उपचारका क्रममा निधन भएको फक्स फोर न्यूजले जनाएको छ ।
ललित लामो समय नेपालका भुटानी शरणार्थी शिविरमा बसेर आईओएम र अमेरिकी सरकारको कार्यक्रम अन्तर्गत अमेरिका गएका थिए । उनी अमेरिका जानुअघि मोरङको पथरी शिविरमा बस्दै आएका थिए ।
प्रधानले शनिबार मात्रै फेसबुकमा लामो स्टाटस लेख्दै मेडिकेट लगायतका सुविधा नहुँदा समस्या परेको गुनासो गरेका थिए । प्रधान डिप्रेसन रहेको उनीनिकटले बताएका छन् ।
रजनी उनकी दोस्रो पत्नी हुन् । उनको माइती काठमाडौँमा हो । माइती पक्षले उनको शव पठाइदिन माग गरेका छन् ।
