गृहमन्त्री रमेश लेखकले भिजिट भिसा प्रकरणमा आफ्नोविरुद्ध नियोजित ढंगले गलत प्रचारबाजी भएको बताएका छन् ।
शुक्रबार प्रतिनिधिसभाको बैठकमा आफ्नोबारे उठेका प्रश्नको जवाफ दिने क्रममा उनले त्रिभुवन विमानस्थल अध्यागमन कार्यालयमा भइरहेको भिजिट भिसा प्रकरण आफूले मिडियाबाट थाहा पाएको बताए ।
आफ्नोविरुद्ध षड्यन्त्र भइरहेको बताउँदै उनले राजनीतिक रुपमा आक्रमण गर्ने प्रयास पनि गरिएको जिकिर गरे ।
संविधानबाट अधिकार प्राप्त संवैधानिक निकायले गरिरहेको भ्रष्टाचारको छानबिनमा सरकारले जवाफ दिनु आवश्यक नरहेको उनले बताए ।
‘त्रिभुवन विमानस्थल अध्यागमन कार्यालयका सहसचिव तीर्थराज भट्टराईलाई भिजिट भिसासम्बन्धी विषयमा सोधपुछका लागि अख्तियार दुरुपयोग अनुसन्धान आयोगबाट बोलाइएको भन्ने विषय मैले सञ्चार माध्यमबाटै थाहा पाएको हुँ’, उनले भने, ‘अख्तियारले अनुसन्धान थालेको विषयमा मेरो संलग्नता छ भनी गरिएको प्रचारमा सत्यता छैन । उक्त कार्यमा मेरो संलग्नता छैन र हुन सक्दैन ।’
अख्तियारबाट हुने भ्रष्टाचारविरोधी कारबाहीमा आफूले खुला हृदयले स्वागत गर्ने उनले बताएका छन् । संवैधानिक निकाय अख्तियारले गर्ने काम कारबाहीमा कतैबाट पनि प्रभावित पार्न नहुने उनले बताए ।
आफू न्यूनतम् नैतिक आचरणमा बस्ने व्यक्ति भएको कुरा सबैलाई थाहा रहेको उनले बताए । लेखकले अख्तियारबाट हुने काम कारबाहीमा आफ्नो पूर्ण सहयोग र समर्थन रहने पनि बताए ।
‘आयोगमा भइरहेको अनुसन्धानको बारेमा मलाई कुनै जानकारी हुँदैन र छैन’, उनले भने, ‘अनुसन्धानमा आयोगले कुनै समय माग गरेको अवस्थामा मन्त्रालय र मातहतको पूर्ण सहयोग रहने प्रतिबद्धता जनाउँछु ।’
